Deputeti i PS dhe ish-kryebashkiaku i Tepelenës, Tërmet Peçi, është paraqitur në ambientet e Struktura e Posaçme Kundër Korrupsionit dhe Krimit të Organizuar, ku ka qëndruar për rreth dy orë.

Sipas raportimit të gazetares Anila Hoxha, SPAK e ka marrë në pyetje deputetin socialist në kuadër të një hetimi që lidhet me periudhën kur ai drejtonte Bashkinë e Tepelenës.

Burime për Top Channel bëjnë me dije se Peçi është pyetur këtë herë për një kontratë qiraje të lidhur nga këshilli bashkiak për një sipërfaqe kullote.

Procedura në fjalë lidhet me dhënien me qira për 99 vite të një sipërfaqeje prej më shumë se një hektari, e cila rezultonte tokë kullotë, por ishte mbjellë me pemë arrore.

Më herët, deputeti socialist ishte marrë në pyetje edhe në cilësinë e deklaruesit për mënyrën e privatizimit të ish-Pallatit të Pionierëve në Tepelenë, pas një kallëzimi të bërë nga një prej pronarëve të objektit.

Sipas burimeve, gjatë dëshmisë së tij, Peçi ka këmbëngulur se nuk mund të mbajë përgjegjësi për dokumente që datojnë që prej vitit 1986.