Ministri izraelit i Sigurisë Kombëtare, Itamar Ben-Gvir, ka bërë deklarata të forta dhe shqetësuese lidhur me operacionet ushtarake në Gaza, duke kërkuar që forcat izraelite të vrasin dhjetëra palestinezë çdo natë.
Gjatë një podcasti me Rom Braslavskyn, ish-peng i Hamasit në Gaza, Ben-Gvir deklaroi se ushtria izraelite “duhet të vrasë 30 ose 40” palestinezë çdo natë dhe se nuk duhet të kufizohet vetëm te personat që paraqesin rrezik në një moment të caktuar.
“Ka njerëz atje që nuk meritojnë të jetojnë. Ata nuk duhet të jetojnë. Ata nuk janë as njerëz”, tha ministri izraelit, duke bërë thirrje për vrasje të synuara të palestinezëve në Gaza.
Ben-Gvir kundërshtoi gjithashtu vendimin e kryeministrit Benjamin Netanyahu për të kufizuar sulmet ushtarake në territorin palestinez.
Gjatë bisedës, Braslavsky i kërkoi Ben-Gvirit që të lejohej të merrte pjesë personalisht në ekzekutimet e të burgosurve palestinezë, nëse dënimi me vdekje do të zbatohej ndaj tyre.
“Kam një kërkesë personale. Më lejoni të jem unë ai që i var ata”, i tha ai ministrit, duke shtuar se nuk dëshironte litar, por një mënyrë tjetër për t’i ekzekutuar.
Ben-Gvir iu përgjigj se do të bënte gjithçka që mundej për ta realizuar këtë kërkesë.
“Do ta kthej botën përmbys që kjo të ndodhë. Të premtoj se do të bëj gjithçka që mundem”, deklaroi ai.
Deklaratat vijnë në një kohë kur lufta në Gaza dhe mënyra e zhvillimit të operacioneve ushtarake izraelite vijojnë të shkaktojnë reagime dhe shqetësime të forta ndërkombëtare.
Sipas Al Jazeera, deklaratat e Ben-Gvirit u bënë gjatë podcastit me ish-pengun Rom Braslavsky.
