Kreu i Partisë Demokratike, Sali Berisha, ka reaguar ndaj pretendimeve për një marrëveshje të mundshme mes tij dhe kryeministrit Edi Rama, duke i cilësuar këto zëra si propagandë dhe “logjikë primitive”.

Gjatë një bashkëbisedimi me qytetarët, Berisha deklaroi se këto pretendime synojnë të relativizojnë dallimet mes tij dhe Ramës, në një moment që, sipas tij, kryeministri është “demaskuar” para opinionit publik.

“Tani që është demaskuar para shqiptarëve dhe botës, thotë që edhe Berisha është njësoj si Rama, në një kohë kur nuk japin dot një fakt të vetëm për këtë krahasim,” u shpreh ai.

Berisha theksoi se nuk ekziston asnjë provë që mund të mbështesë një marrëveshje mes tyre dhe sfidoi publikisht çdo pretendim në këtë drejtim.

Ai akuzoi gjithashtu kundërshtarët politikë se përpiqen të krijojnë një perceptim të rremë për të përmirësuar imazhin e kryeministrit.

“Duan të përmirësojnë figurën e nxirë të Edi Ramës duke krahasuar të pakrahasueshmet,” tha Berisha.

Në vijim, lideri demokrat shtoi se Rama nuk ka arritur ta mposhtë atë politikisht, pavarësisht përpjekjeve të vazhdueshme.

“Edi Rama nuk e mposht dot Sali Berishën. U përpoq me çdo mënyrë, por ka dështuar dhe do të dështojë,” deklaroi ai.

Berisha e cilësoi gjithashtu situatën mediatike si të ndikuar nga pushteti, duke theksuar se, sipas tij, kontrolli mbi fjalën e lirë përbën një problem serioz.

Deklaratat e tij vijnë në një klimë të tensionuar politike, ku akuzat dhe kundërakuzat mes palëve vijojnë të dominojnë debatin publik.