Bordi i Transparencës ka vendosur çmimet e reja të karburanteve në vend, të cilat kanë hyrë në fuqi këtë të shtunë, më 26 prill, në orën 14:00.
Sipas vendimit të fundit, benzina është shtrenjtuar me 5 lekë për litër, duke arritur në 181 lekë/litër nga 176 lekë/litër që ishte më parë. Ndërkohë, për gazoilin është përcaktuar një çmim maksimal prej 206 lekë/litër në shitje me pakicë dhe 194 lekë/litër në shitje me shumicë.
Për benzinën, çmimi maksimal në shitje me pakicë është vendosur në 181 lekë/litër, ndërsa në shumicë 169 lekë/litër.
Vendimi i Bordi i Transparencës do të mbetet në fuqi deri në mbledhjen e ardhshme, kur pritet të reflektohen ndryshimet e reja të tregut.
Autoritetet u kanë bërë thirrje të gjithë operatorëve të tregtimit të karburanteve që të zbatojnë me përpikëri çmimet e vendosura, duke paralajmëruar masa të forta në rast shkeljesh, deri në pezullim të aktivitetit.
Ndërkohë, Ministria e Ekonomisë dhe Inovacionit, në bashkëpunim me Ministria e Financave dhe Ministria e Infrastrukturës dhe Energjisë, theksojnë se janë të angazhuara për mbrojtjen e interesave të konsumatorëve dhe garantimin e konkurrencës së ndershme në tregun e karburanteve.
