Në portin e Durrësit ka mbërritur sot anija ‘Moliva’, që bëri transportin e mbetjeve që dyshohen të dëmshme.

Më pas pritet që të kryhet procedura e shkarkimit të 102 kontejnerëve në kalatë dhe transportimi i tyre jashtë hapësirave portuale, në një zonë të konsideruar të sigurt nga autoritetet.

Sipas disa burimeve nga porti dhe kapitaneria ” është parashikuar qe 102 kontejnerët me mbetjet e rrezikshme do transportohen në një zonë në Porto Romano, ku do të mbahen të mbikëqyrura 24 orë siç ka kërkuar edhe Prokuroria e Durrësit.

Pas vendosjes së tyre në këtë hapësirë të sigurt, pritet të procedohet me marrjen e kampionëve nga secili kontejnerë dhe dërgimin e tyre në një laborator të specializuar.

Anija me mbetjet e refuzuara nga autoritetet tajlandeze mbërriti në Durrës më 28 tetor. Prej më shumë se 10 ditësh anija ndodhej në radën e portit.

Kapiteneria e Portit pohoi se janë në dijeni të vendimit të marrë por po presin shkresën zyrtare nga Autoriteti Portual me email për të vendosur hyrjen e anijes në Portin e Durrësit.