Emiratet e Bashkuara Arabe po përdorin metoda të pazakonta për të vijuar eksportin e naftës përmes Ngushtica e Hormuzit, në një kohë kur tensionet në rajon kanë rritur ndjeshëm rrezikun për transportin detar të energjisë.
Sipas të dhënave të industrisë dhe analizave të trafikut detar, disa cisterna nafte kanë kaluar ngushticën me sistemet e gjurmimit të fikura, një praktikë që synon shmangien e zbulimit dhe uljen e rrezikut nga sulme të mundshme në zonë, raporton Reuters.
Megjithëse këto dërgesa përbëjnë një pjesë të kufizuar të eksporteve totale, ato tregojnë përpjekjet e vendeve prodhuese dhe blerësve për të mbajtur të hapur furnizimin global me naftë, pavarësisht pasigurisë së lartë në Gjirin Persik.
Në muajin prill, kompania shtetërore e naftës ADNOC ka eksportuar rreth 6 milionë fuçi naftë përmes katër cisternave, me destinacione kryesisht në Azi Juglindore dhe Korenë e Jugut.
Situata në Ngushticën e Hormuzit është përkeqësuar pas përshkallëzimit të tensioneve SHBA–Iran, duke ndikuar në kufizimin e lëvizjes së anijeve dhe rritjen e çmimeve të naftës mbi 100 dollarë për fuçi.
Ndërkohë, vende të tjera të rajonit si Iraku, Kuvajti dhe Katari kanë reduktuar ose ndalur përkohësisht eksportet, ndërsa Arabia Saudite po përdor rrugë alternative përmes Detit të Kuq.
Ekspertët vlerësojnë se përdorimi i cisternave me gjurmim të fikur tregon nivelin e lartë të tensionit në një nga korridoret më strategjike të tregtisë globale të energjisë, ku çdo ndërprerje ka ndikim të menjëhershëm në tregjet botërore.
