Presidenti i Serbisë, Aleksandër Vuçiç, ka reaguar sërish publikisht ndaj pretendimeve të përsëritura se ai është djali i gazetarit shqiptar Fahri Musliu, duke i cilësuar këto akuza si gënjeshtra të mëdha dhe të përdorura për qëllime politike.

Gjatë një podcasti “The Rest Is Politics: Leading”, Vuçiç u shpreh i revoltuar, duke thënë se këto pretendime synojnë ta dëmtojnë politikisht dhe të ndikojnë në perceptimin publik ndaj tij.

Ai deklaroi se është prekur edhe familjarisht nga këto akuza, duke i konsideruar si sulme që, sipas tij, synojnë të cenojnë moralin e nënës së tij dhe të krijojnë narrativën se ai ka prejardhje shqiptare, gjë që ai e mohon kategorikisht.

Vuçiç i quajti këto pretendime si një nga “mallkimet” më të rënda që, sipas tij, e kanë shoqëruar gjatë karrierës politike.

“…janë akuza që përdoren për të më goditur politikisht,” u shpreh ai gjatë intervistës.

Nga ana tjetër, gazetari Fahri Musliu i ka mohuar vazhdimisht këto pretendime, duke i cilësuar si shpifje. Në deklarata publike të mëparshme, ai ka theksuar se nuk ka asnjë lidhje familjare me presidentin serb dhe se këto thashetheme janë të pavërteta dhe të dhimbshme për të.

Musliu ka shtuar se, pavarësisht komenteve në rrjetet sociale, pretendimet nuk kanë asnjë bazë dhe se ai nuk ka asnjë lidhje biologjike me Vuçiç.