Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Tensione të forta janë shënuar gjatë protestës së Partisë Demokratike të Shqipërisë në Tiranë, ku deputeti Flamur Noka është përplasur me efektivët e Policia e Shtetit dhe ka thyer kordonin e sigurisë pranë Piramidës.
Gjatë përplasjes janë hedhur edhe molotovë, ndërsa situata është përshkallëzuar në disa pika të kryeqytetit.
Marshimi i protestuesve, pa një itinerar të qartë, ka pasur deri më tani disa ndalesa të shoqëruara me incidente, përfshirë zonën e Kryeministrisë, Ministrisë së Infrastrukturës dhe Energjisë dhe selinë e Partisë Socialiste të Shqipërisë.
Protestuesit kanë vijuar më tej drejt zonës së ish-Bllokut, duke kaluar edhe pranë Drejtorisë së Policisë, por pa u ndalur.
Gjatë marshimit janë raportuar edhe hedhje fishekzjarresh në koshat e mbeturinave, si dhe një molotov pranë një stacioni autobusi.
Ndërkohë, forcat “Shqiponja” kanë krijuar një korridor sigurie duke bllokuar rrugicat që çojnë drejt Vilës 31, me qëllim orientimin e protestuesve drejt bulevardit Dëshmorët e Kombit.
Situata mbetet e tensionuar dhe në zhvillim, ndërsa policia vijon përpjekjet për të mbajtur nën kontroll përshkallëzimin e protestës.
