Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Gjykata e Shkallës së Parë të Juridiksionit të Përgjithshëm në Tiranë ka kthyer për plotësim kërkesën e depozituar nga Evi Kokalari, e cila synonte pezullimin e procesit për zgjedhjen e kryetarit të Partia Demokratike e Shqipërisë.
Sipas njoftimit zyrtar, kërkesa është paraqitur më 11 maj 2026 në Dhomën Civile të gjykatës, me objekt marrjen e masës së sigurimit të padisë për pezullimin e veprimeve të Komisionit të Organizimit dhe Kontrollit të Operacioneve Elektorale (KOKOE), si dhe të çdo veprimi tjetër organizativ dhe elektoral që lidhet me procesin për zgjedhjen e kryetarit të PD-së.
Pas shqyrtimit brenda afateve ligjore, gjykata ka vendosur kthimin e kërkesës me të meta, për shkak të mosplotësimit të kritereve formale dhe proceduriale të parashikuara nga nenet 154-156 të Kodit të Procedurës Civile.
Në vendimin e saj, gjykata sqaron se kthimi i kërkesës nuk përbën një vendim përfundimtar për çështjen dhe nuk hyn në shqyrtimin e themelit të padisë.
Sipas gjykatës, pala kërkuese ka të drejtë që, pasi të plotësojë mangësitë e konstatuara, t’i drejtohet sërish gjykatës me kërkesën e saj.
Po ashtu, Evi Kokalari ka të drejtën e ankimit të veçantë në Gjykatën e Apelit të Juridiksionit të Përgjithshëm, brenda 5 ditëve nga komunikimi i vendimit të arsyetuar.
