Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Diplomati amerikan Richard Grenell, i njohur për rolin e tij në dialogun Kosovë-Serbi dhe si një nga bashkëpunëtorët e Donald Trump, është përfshirë në një skandal që lidhet me një donacion prej miliona dollarësh për Qendrën Kennedy. Në të njëjtën kohë, ai ka pranuar se mandati i tij si i dërguar special presidencial kishte përfunduar që në shkurt të këtij viti, pa u bërë publik më parë ky ndryshim.
Sipas medias amerikane The Daily Beast, Grenell ka konfirmuar se nuk është më i Dërguari Special Presidencial i SHBA-së për Misione Speciale. Një zyrtar i Departamentit të Shtetit ka konfirmuar gjithashtu se ai nuk është më i punësuar nga kjo agjenci.
Grenell pretendon se emërimi i tij ishte parashikuar të përfundonte në shkurt, por The Daily Beast raporton se nuk ka gjetur ndonjë deklaratë publike të mëparshme që të përcaktonte datën e përfundimit të mandatit.
Megjithatë, edhe pas përfundimit të tij, Grenell është prezantuar në publik me titullin e të dërguarit special. Më 6 tetor, një postim i përbashkët në Instagram nga ai dhe Konferenca e Veprimit Politik Konservator (CPAC) e identifikonte ende me këtë funksion.
Akuzat për 5.6 milionë dollarë
Përtej çështjes së mandatit, Grenell po përballet me akuza që lidhen me një donacion të konsiderueshëm për Qendrën Kennedy, institucionin kulturor që ai drejtoi gjatë administratës Trump.
Sipas raportimeve të Axios, ish-avokatja e Trump, Alina Habba, dhe bashkëshorti i saj, biznesmeni Turhan Mildon, e akuzojnë Grenellin se një pjesë e parave të destinuara për institucionin nuk mbërritën kurrë atje.
Sipas pretendimeve të raportuara, në maj të vitit 2025, Mildon transferoi 17.6 milionë dollarë drejt kompanisë teksane TX-AT, pas udhëzimeve që, sipas Habbas, i kishte marrë nga Grenell. Nga kjo shumë, 5.6 milionë dollarë duhej të shkonin për Qendrën Kennedy, por Habba pretendon se fondet nuk mbërritën në destinacionin e parashikuar.
Grenell i ka mohuar akuzat, duke i cilësuar ato si absurde. Në një deklaratë për The Times, ai ka mohuar se ka kërkuar transferimin e parave diku tjetër duke pretenduar se ato ishin për Qendrën Kennedy, si dhe ka mohuar të ketë marrë pagesa nga Mildon.
Përplasja vjen pas drejtimit të debatueshëm të Qendrës Kennedy nga Grenell, gjatë të cilit ndryshimet e mbështetura nga Trump dhe orientimi i institucionit drejt lëvizjes MAGA u shoqëruan, sipas raportimeve amerikane, me bojkot artistësh dhe rënie të shitjeve të biletave.
Grenell u emërua nga Trump në dhjetor 2024 si i Dërguar Special Presidencial për Misione Speciale. Gjatë karrierës së tij, ai ka shërbyer si ambasador i SHBA-së në Gjermani, i dërguar për negociatat Kosovë-Serbi dhe drejtor në detyrë i inteligjencës kombëtare.
