Një dhuratë e pazakontë nga presidenti turk, Rexhep Tajip Erdogan, ka tërhequr vëmendjen pas përfundimit të samitit të NATO-s, të zhvilluar në Ankara më 7 dhe 8 korrik 2026. Në fund të takimit, liderët e vendeve anëtare të Aleancës morën si dhuratë një revolver të personalizuar të tipit Magnum .357, të shoqëruar me municione luftarake.
Revolverët ishin vendosur në kuti druri dhe secili mbante të gdhendur emrin e marrësit, flamurin turk dhe një pllakë metalike me mbishkrimin: “Gumusay, pistoleta e parë e tipit revolver e prodhuar në vendin tonë”.
Sipas raportimeve, dhurata u shoqërua edhe me një përjashtim nga procedurat e zakonshme të kontrollit të eksporteve, për të lehtësuar transportimin e saj drejt vendeve të liderëve pjesëmarrës.
Megjithatë, mënyra se si është administruar kjo dhuratë ka ndryshuar nga një shtet në tjetrin, pasi shumica e vendeve kanë zgjedhur ta dorëzojnë armën tek autoritetet shtetërore ose ta depozitojnë në muze.
Gjermania
Kancelari Friedrich Merz ia dorëzoi revolverin Ambasadës Gjermane në Ankara, e cila do të organizojë transportin e tij drejt Berlinit. Më pas arma do t’i shtohet koleksionit zyrtar të dhuratave shtetërore.
Një zëdhënës i qeverisë gjermane bëri të ditur se revolveri do të importohet sipas procedurave ligjore dhe do të regjistrohet në inventarin shtetëror, në përputhje me rregullat që kufizojnë pranimin e dhuratave nga zyrtarët publikë.
Spanja
Kryeministri Pedro Sánchez vendosi ta transferojë armën në Ministrinë e Brendshme. Autoritetet spanjolle kanë bërë të ditur se revolveri do të çaktivizohet nga Shërbimi i Ndërhyrjes ndaj Armëve i Guardia Civile.
Portugalia
Kryeministri Luis Montenegro ia dorëzoi armën policisë portugeze. Aktualisht ajo ndodhet në Departamentin e Armëve dhe Eksplozivëve, ku do t’i nënshtrohet analizës mjeko-ligjore për të përcaktuar procedurat ligjore që do të ndiqen.
Polonia
Sekretari i Shtetit, Marcin Przydacz, deklaroi se revolveri do të ruhet në një ambient të posaçëm dhe të sigurt.
Ai sqaroi se arma kishte kaluar të gjitha procedurat doganore dhe kontrollet përkatëse, duke shtuar se nuk dihej nëse bëhej fjalë për një armë origjinale apo për një kopje.
“Sigurisht, askush nuk do ta përdorë për të qëlluar”, u shpreh ai.
Belgjika
Kryeministri Bart De Wever mësohet se u surprizua nga natyra e dhuratës vetëm pasi u kthye në Belgjikë. Ai ia dorëzoi revolverin policisë së aeroportit menjëherë pas mbërritjes.
Sipas mediave, ekipi i tij i sigurisë u mor edhe me armët e dhuruara për presidenten e Komisionit Europian, Ursula von der Leyen, dhe presidentin e Këshillit Europian, Antonio Costa.
Italia
Burime nga qeveria italiane bëjnë të ditur se revolveri është regjistruar dhe depozituar në Pallatin Chigi, sipas procedurave që ndiqen për të gjitha dhuratat zyrtare që marrin kryeministrat italianë.
Greqia
Kryeministri Kyriakos Mitsotakis ka vendosur që revolveri t’i dhurohet Muzeut të Luftës në Athinë.
Mbretëria e Bashkuar
Kryeministri britanik Keir Starmer nuk e mori armën me vete gjatë kthimit, por e la në kujdesin e zyrtarëve britanikë në Turqi. Revolveri pritet të çaktivizohet përpara se të transportohet në Mbretërinë e Bashkuar.
Kanadaja
Kryeministri Mark Carney reagoi me humor, duke thënë se dhurata tradicionale kanadeze me shurup panje ishte “më pak mbresëlënëse” se revolveri i dhuruar nga Erdogan.
Ai bëri të ditur se arma do të çmontohet dhe shtoi se vendi i saj është në një muze lufte.
“Është një objekt interesant dhe lidhet me historinë e NATO-s”, deklaroi Carney.
Dhurata e presidentit turk ka ngjallur diskutime në disa vende anëtare të NATO-s, jo vetëm për simbolikën e saj, por edhe për procedurat ligjore që duhen ndjekur për pranimin, transportimin dhe administrimin e armëve të zjarrit si dhurata zyrtare.
