Ka përfunduar pas më shumë se një ore mbledhja e zhvilluar këtë të mërkurë nga kryeministri Edi Rama me drejtuesit politikë të qarqeve dhe drejtues të Partisë Socialiste, në një takim që vjen në një moment të ndjeshëm politik, teksa në Tiranë vijojnë prej javësh protestat kundër qeverisë.
Takimi nisi pak minuta pas orarit të njoftuar, rreth orës 08:30, dhe u zhvillua me dyer të mbyllura. Në fokus të diskutimeve kanë qenë puna në terren, komunikimi me qytetarët, organizimi politik në qarqe, si dhe situata e krijuar nga protestat që po mbahen prej më shumë se tre javësh në kryeqytet.
Sipas informacioneve nga mbledhja, kryeministri Rama u ka kërkuar drejtuesve politikë dhe ministrave që të shtojnë praninë e tyre pranë qytetarëve dhe të jenë më të angazhuar në adresimin e problematikave dhe shqetësimeve që ngrihen nga komunitetet në të gjithë vendin.
Kreu i qeverisë ka theksuar nevojën për një komunikim më të drejtpërdrejtë me qytetarët, duke kërkuar që përfaqësuesit e Partisë Socialiste dhe anëtarët e kabinetit qeveritar të mos shkëputen nga realiteti në terren dhe të dëgjojnë nga afër kërkesat dhe problematikat e njerëzve.
Gjatë diskutimeve, Rama ka komentuar edhe protestat që po zhvillohen në Tiranë, duke i cilësuar ato si pjesë të një beteje që po zhvillohet kryesisht në hapësirën digjitale.
Sipas burimeve, kryeministri është shprehur se bëhet fjalë për një “luftë digjitale”, duke lënë të kuptohet se ndikimi i rrjeteve sociale dhe komunikimit online po luan një rol të rëndësishëm në mobilizimin e protestuesve dhe në debatin publik që po zhvillohet rreth qeverisë.
Megjithatë, ai ka pranuar se kjo është një situatë e vështirë për t’u përballuar me mjetet tradicionale politike dhe institucionale.
Pas përfundimit të mbledhjes, Rama u pa duke dalë nga ambientet e takimit i shoqëruar nga kreu i Grupit Parlamentar të Partisë Socialiste, Taulant Balla. Të dy zhvilluan një komunikim të shkurtër përpara se kryeministri të largohej me automjetin e tij drejt angazhimit të radhës.
Ndryshe nga herët e tjera, Rama nuk ndaloi për të dhënë deklarata për mediat e pranishme. Ai u mjaftua vetëm me një përshëndetje të shkurtër për gazetarët dhe vijoi axhendën e planifikuar.
Menjëherë pas mbledhjes me drejtuesit politikë të qarqeve, kryeministri pritet të zhvillojë një tjetër takim të rëndësishëm, këtë herë me kryetarët e bashkive të vendit.
Takimi me kryebashkiakët është parashikuar të mbahet në orën 09:30 në ambientet e ish-Hotel “Dajti” në Tiranë dhe pritet të fokusohet në çështje që lidhen me administrimin vendor, investimet, projektet infrastrukturore dhe koordinimin mes qeverisë qendrore dhe pushtetit vendor.
Mbledhja e sotme vjen vetëm pak ditë pas takimit të zgjeruar të kryeministrit me grupin parlamentar socialist dhe anëtarët e kabinetit qeveritar, ku u diskutuan prioritetet politike dhe administrative të mazhorancës për muajt në vijim.
Takimet e njëpasnjëshme të Ramës me strukturat drejtuese të Partisë Socialiste dhe përfaqësuesit e pushtetit vendor zhvillohen në një periudhë kur klima politike në vend mbetet e tensionuar, ndërsa protestat që kërkojnë dorëheqjen e kryeministrit dhe ndryshime politike vijojnë prej më shumë se tre javësh në qendër të Tiranës.
Në këtë kontekst, mbledhja me drejtuesit politikë është parë edhe si një përpjekje për të koordinuar qëndrimet dhe veprimet e strukturave të Partisë Socialiste përballë zhvillimeve të fundit politike dhe debatit publik që po shoqëron protestat.
