Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Kryeministri Edi Rama ka konfirmuar zyrtarisht përjashtimin e Elisa Spiropalit dhe Plarent Ndrecës nga Partia Socialiste. Gjatë fjalës së tij në Asamblenë e PS-së në Tiranë, Rama sqaroi se të dy nuk janë më pjesë e forcës politike, duke i cilësuar si dy të përjashtuarit e ditëve të fundit.
Deklarata e kryesocialistit vjen pas vendimit të marrë një javë më parë në mbledhjen e Asamblesë Kombëtare të PS-së në Gjirin e Lalëzit, i cili kishte shkaktuar paqartësi lidhur me statusin e dy figurave socialiste.
Rama u ndal veçanërisht te Plarent Ndreca, pasi ky i fundit i është drejtuar me shkresë Bashkisë së Tiranës, duke firmosur në cilësinë e drejtuesit politik. Kryeministri e kundërshtoi këtë veprim, duke theksuar se Ndreca nuk e ka më këtë status brenda Partisë Socialiste.
“Ky i fundit (Plarent Ndreca) i adresohet shkresërisht Bashkisë së Tiranës, duke firmosur si drejtues politik, ndërkohë që është thjesht një nga dy të përjashtuarit e ditëve të fundit nga kjo shtëpi”, deklaroi Rama.
Më tej, kreu i PS-së dha një mesazh të qartë për qëndrimet jashtë linjës së partisë, duke nënvizuar se nuk do të tolerohen më sjellje që, sipas tij, bien ndesh me detyrimet ndaj Partisë Socialiste dhe qytetarëve.
Në të njëjtën fjalë, Rama u rikthye edhe te situata në Bashkinë e Tiranës dhe largimet nga puna të disa punonjësve, për të cilat akuzoi njerëz të afërt me kryebashkiakun Erion Veliaj.
Ai paralajmëroi drejtuesit dhe strukturat e Bashkisë se çdo vendim për largimin e punonjësve për motive që i konsideron të pajustifikuara do të ketë pasoja politike.
“Çdo drejtuesi dhe çdo hallke të Bashkisë së Tiranës, ju them sot se goditja e njerëzve në krye të detyrës, me porosi nga lart, me motive krejt të pajustifikueshme, as nuk do të harrohet dhe as nuk do të falet”, u shpreh Rama.
Deklaratat e kryeministrit konfirmojnë përjashtimin e Spiropalit dhe Ndrecës, ndërsa tensionet brenda Partisë Socialiste vijojnë të shfaqen edhe në përplasjet për administrimin e Bashkisë së Tiranës.



