Buxheti i shtetit ka përfituar deri më tani rreth 553 milionë lekë nga rritja e çmimeve të hidrokarbureve, ndërsa efekti financiar i uljes së akcizës së naftës me 20% llogaritet vetëm në rreth 37 milionë lekë për muajin prill, sipas të dhënave të diskutuara në komisionet parlamentare.
Në Kuvend, mazhoranca ka miratuar aktin normativ që parashikon uljen e akcizës me 20% për naftën sa herë që çmimi i saj kalon 220 lekë për litër, ndërsa për benzinën mbi 200 lekë për litër. Masa fiskale do të mbetet në fuqi deri në përfundim të situatës së krijuar nga tensionet dhe lufta në Lindjen e Mesme.
Vendimi është shqyrtuar dhe miratuar në Komisionin e Ligjeve, ku u theksua se lehtësimi fiskal u aplikua për herë të parë më 3 prill, kur çmimi i naftës arriti në 233 lekë për litër, por pas uljes së akcizës qytetarët kanë paguar rreth 224 lekë për litër.
Nga ana tjetër, opozita ka kërkuar ndërhyrje më të thellë në taksimin e karburanteve, përfshirë edhe uljen e taksës së qarkullimit. Megjithatë, propozimi u rrëzua në Komisionin e Ekonomisë me votat e mazhorancës.
Sipas argumentit të mazhorancës, masat e ndërmarra nga qeveria deri tani janë të mjaftueshme për të mbajtur nën kontroll efektet e rritjes së çmimeve dhe për të shmangur goditje më të forta mbi konsumatorët.
Debati mbi taksimin e karburanteve pritet të vijojë edhe në seancat e ardhshme parlamentare, në një kohë kur çmimet në tregjet ndërkombëtare mbeten të luhatshme.
