Prokuroria e Posaçme kundër Korrupsionit dhe Krimit të Organizuar (SPAK) ka zhvilluar kontrolle ndaj disa punonjësve të Hipotekës së Vlorës, në kuadër të hetimeve për çështjen e tokave në zonën e Zvërnecit.
Burime bëjnë me dije se në fokus të hetimit janë katër zyrtarë, Rembrand Dine, Vanesa Bylo, Ergyst Skenderi dhe Reinard Metaj.
Sipas të njëjtave burime, kontrollet lidhen me procedurat e administrimit dhe regjistrimit të pronave në zonën e Zvërnecit, ku SPAK prej disa kohësh po heton mënyrën e përfitimit të tokave nga individë dhe kompani të ndryshme.
Hetimet përfshijnë gjithashtu procedurat që lidhen me projektin për ndërtimin e resorteve turistike në këtë zonë, i promovuar si një investim i lidhur me dhëndrin e Presidentit amerikan, Jared Kushner.
Deri tani, SPAK nuk ka dalë me një njoftim zyrtar për operacionin dhe nuk ka bërë publike veprat penale për të cilat po zhvillohen hetimet.
