Shpenzimet për sektorët socialë do të njohin rritje të ndjeshme në tri vitet e ardhshme, sipas Programit Buxhetor Afatmesëm 2026–2028, të miratuar nga Këshilli i Ministrave. Në fokus do të jenë pensionet, ndihma ekonomike, shërbimet shëndetësore dhe mbështetja për kategoritë më vulnerabël të shoqërisë.
Rritje me mbi 29 miliardë lekë për pensionet
Fondi për skemën e pensioneve do të rritet nga 176.2 miliardë lekë në vitin 2025 në 205.4 miliardë lekë në vitin 2028, një rritje me 29.2 miliardë lekë. Qeveria e justifikon këtë zgjerim me ndikimin e indeksimeve periodike, plakjen e popullsisë dhe rritjen e kostos së jetesës, duke nënvizuar nevojën për garantimin e qëndrueshmërisë së sistemit.
Ndihma ekonomike me 2.3 miliardë lekë më shumë
Fondi për ndihmën ekonomike do të rritet nga 8 miliardë lekë në 2025 në 10.3 miliardë lekë në 2028, me theks të veçantë në ndihmën e targetuar për familjet në nevojë, gratë kryefamiljare, të papunët afatgjatë dhe persona në kushte të vështira jetese. Mbështetja do të bëhet përmes një sistemi të përmirësuar të përzgjedhjes dhe pikëzimit, që synon drejtësinë sociale.
Shëndetësia dhe mbrojtja sociale: fonde shtesë dhe investime të reja
Ministria e Shëndetësisë do të përfitojë 75.8 miliardë lekë në vitin 2028, krahasuar me 69.1 miliardë lekë në 2025, duke përfshirë rritje për barnat e rimbursueshme (nga 15.1 në 17.2 miliardë lekë), shërbimet e Urgjencës Kombëtare, zonat rurale dhe infrastrukturën spitalore.
Edhe fakti për mbrojtjen sociale do të pësojë rritje: nga 20.4 miliardë lekë në vitin 2025 në 22.6 miliardë lekë në vitin 2028, me synim përmirësimin e shërbimeve për personat me aftësi të kufizuara, jetimët, gratë viktima të dhunës dhe kategori të tjera të pambrojtura.
Rritje ekonomike e qëndrueshme dhe buxhet më i balancuar
Qeveria parashikon ruajtjen e një norme rritjeje ekonomike prej 4% në vit, duke rritur buxhetin total të shtetit nga 4.7 miliardë euro në 2025 në mbi 4.9 miliardë euro në 2028. Shpenzimet do të orientohen gjithnjë e më shumë drejt kujdesit social, duke reduktuar gradualisht peshën e investimeve infrastrukturore.
Ministria e Infrastrukturës, për shembull, do të ketë një rënie të lehtë në buxhet: nga 760 milionë euro në 2026 në 714 milionë euro në vitin 2028, duke i lënë më shumë hapësirë financimit të sektorëve socialë dhe atyre të kujdesit njerëzor.
