Sali Berisha ka denoncuar sot qeverinë për mënyrën se si po vepron ndaj qytetarëve të prekur nga fatkeqësitë natyrore, duke e konsideruar veprimin e saj si një “krim shtetëror”. Ai akuzoi zyrtarët se pasurohen mbi fatkeqësitë dhe nuk sigurojnë ndihmë të drejtë për të dëmtuarit.

“Që kjo qeveri vjedh dhe nuk zhdëmton, shko e pyet të dëmtuarit nga tërmeti në Durrës, në Laç, në Kurbin, Lezhë, Tiranë dhe kudo. Këta janë të pamëshirë. Pasurohen mbi fatkeqësinë e qytetarëve”, tha Berisha.

Ai u fokusua veçanërisht te ngjarjet në Theth, duke theksuar se edhe ato përbëjnë një krim të mirëfilltë shtetëror. “Ndërtimet kanë qenë në zonën e lejuar për ndërtime. Ndërtimet kanë qenë në tokat e tyre. Edhe ai është një krim shtetëror dhe do të bëjmë gjithçka që ndaj krimit shtetëror të ndëshkohen autorët dhe të dëmshpërblehen viktimat”, theksoi Berisha.

Sipas tij, indiferenca e qeverisë dhe mosveprimi për dëmshpërblimin e qytetarëve të prekur nga fatkeqësitë natyrore reflekton një model të qëndrueshëm keqmenaxhimi dhe përfitimi mbi fatkeqësitë e qytetarëve, duke e kthyer këtë situatë në një çështje parimore që kërkon veprim të menjëhershëm.

Berisha gjithashtu siguroi qytetarët e zonave të dëmtuara se do të bëhet gjithçka e mundur për të ndjekur ligjërisht autorët dhe për të siguruar kompensimin e plotë për viktimat e krimeve shtetërore të dokumentuara.