Kryetari i Bashkisë së Tiranës, Erion Veliaj, ka depozituar një kërkesë zyrtare pranë Gjykatës së Posaçme kundër Korrupsionit dhe Krimit të Organizuar (GJKKO), duke kërkuar shpalljen e pavlefshmërisë dhe papërdorshmërisë së akteve hetimore të kryera nga Prokuroria e Posaçme ndaj tij.
Në dokumentin e dorëzuar, që përmban 77 faqe, Veliaj liston një sërë shkeljesh të pretenduara nga ana e Prokurorisë dhe argumenton se hetimi i deritanishëm duhet të shpallet i pavlefshëm.
Midis shqetësimeve të paraqitura nga kryebashkiaku janë:
Hetimi i çështjes nga një person që nuk ka pasur kurrë statusin ligjor të prokurorit;
Ushtrimi i ndjekjes penale nga një person në konflikt të pastër interesi me subjektin e hetimit;
Nisja e hetimeve mbi bazën e një kallëzimi penal të falsifikuar, pa verifikim të identitetit të kallëzuesit;
Kryerja e veprimeve hetimore pa regjistrim të procedimit penal për të shmangur kontrollin gjyqësor dhe kufizimet ligjore;
Tejkalimi i afateve hetimore dhe fshehja e statusit të personit nën hetim;
Sekuestrimi dhe përdorimi i të dhënave kompjuterike pa vendim gjykate dhe leximi i korrespondencave private pa autorizim ligjor;
Cenimi i së drejtës për mbrojtje efektive, përmes refuzimit të kohës së nevojshme për njohjen me aktet;
Përdorimi i ekspertëve të varur nga vetë organi i akuzës, në kundërshtim me standardet e paanshmërisë;
“Fraksionimi” i çështjes si mjet për të cenuar të drejtën për mbrojtje dhe sigurinë juridike;
Përdorimi i medias si zgjatim i akuzës, përmes rrjedhjeve të qëllimshme dhe manipulimit të opinionit publik.
Në kërkesën e tij, Veliaj thekson se dokumenton me prova të gjitha shkeljet e pretenduara dhe kërkon rikthimin e ligjshmërisë, proporcionalitetit dhe paanësisë në hetim.
Ky hap nga kryebashkiaku vjen pas një periudhe hetimesh intensive nga Prokuroria e Posaçme, të cilat sipas Veliajt kanë shkelur standardet ligjore dhe kanë cenuar të drejtën e tij për mbrojtje efektive.
Veliaj kërkon nga GJKKO që të pranojë kërkesën dhe të shpallë pavlefshmëri të plotë të aktit hetimor, duke rivendosur garancitë ligjore dhe drejtësinë në procesin penal.
