Në një deklaratë që synon të qetësojë shqetësimin e qytetarëve, ministrja e Infrastrukturës dhe Energjetikës, Belinda Balluku, ka garantuar sot se çmimi i ujit nuk do të rritet me rastin e krijimit të Operatorit Kombëtar të Ujit (OKU).

“Të gjithë dalin dhe thonë se qeveria do të rrisë çmimin e ujit, por nuk është e vërtetë”, theksoi Balluku, duke shtuar se fokusi i ri do të jetë në mbrojtjen e burimeve ujore, përshpejtimin e zhvillimit teknologjik dhe sigurinë e ujit që shpërndahet në shtëpi.

Ministrja zbuloi se do të krijohet një njësi e dedikuar për kërkim dhe teknologji brenda operatorit, duke shprehur besimin se vendet që nuk janë “të bekuara” si Shqipëria mund të arrijnë të furnizojnë me ujë 24 orë duke përdorur teknologji të avancuara.

“Kjo do të japë mundësi të kemi zhvillime të bazuara në praktikat më të mira ndërkombëtare”, tha ajo, duke e quajtur këtë një hap pa nevojë për ndryshime ligjore.

Garancia e Ballukut vjen në një moment kur qeveria po përballet me kritika për menaxhimin e sektorit të ujit dhe synon të ndërpresë spekulimet për një rritje të çmimeve si pasojë e ristrukturimit.