Partia Demokratike ka reaguar ashpër pas dekretimit nga Presidenti Bajram Begaj të datës 9 nëntor për zhvillimin e zgjedhjeve të pjesshme lokale në Tiranë dhe në 5 bashki të tjera.
Në një deklaratë për mediat, kreu i grupit parlamentar të PD-së, Gazment Bardhi, e cilësoi vendimin e kreut të shtetit si një shkelje të rëndë të Kushtetutës dhe një akt që minon themelet e shtetit të së drejtës.
“Asnjë surprizë nga Bajram Begaj! Ashtu siç kishim paralajmëruar, Bajram Begaj nuk është President i shqiptarëve, por një robot që komandohet nga Edi Rama. Me shkeljen e rëndë që ka kryer sot ndaj Kushtetutës, Presidenti i Republikës ka kryer një puç kushtetues sepse ka rrënuar edhe autoritetin e Gjykatës Kushtetuese të Shqipërisë dhe themelet mbi të cilat ndërtohet shteti i së drejtës”, deklaroi Bardhi.
Sipas tij, zgjedhjet e pjesshme në Tiranë tashmë ndodhen në një “ngërç kushtetues” për shkak të dekretit të Presidentit. Ai theksoi se juridiksioni i shqyrtimit të ankimimit për vendimin e qeverisë nuk i takon Edi Ramës, por vetëm Kushtetutës dhe Gjykatës Kushtetuese.
“Një mandat kushtetues nuk mund të ndërpritet veçse për shkaqet e parashikuara shprehimisht në Kushtetutë dhe kjo i nënshtrohet kontrollit kushtetues. Askush në 35 vjet demokraci nuk e ka dëmtuar kaq shumë reputacionin e Kreut të Shtetit. Arsyet janë tërësisht banale: Edi Rama ka marrë peng Bajram Begajn, dhe e komandon atë njëlloj si ‘Diellën’”, tha Bardhi.
