Zëdhënësi i Kremlinit, Dmitry Peskov, tha të enjten se Ukraina do të duhet të negociojë me Rusinë “herët a vonë” dhe parashikoi se pozicioni negociues i Kievit do të përkeqësohet çdo ditë.

Moska, forcat e së cilës po përpiqen të marrin kontrollin e qytetit të Pokrovskut në Ukrainën lindore, ka akuzuar zyrtarët ukrainas se refuzojnë të angazhohen në bisedimet e paqes.

Ndërkohë, Kievi thotë se kushtet e Moskës për t’i dhënë fund luftës janë të papranueshme dhe të barabarta me kërkesën për dorëzim.

Peskov, u tha gazetarëve të enjten se Rusia mbetet e hapur për një zgjidhje politike dhe diplomatike dhe dëshiron paqe. Por në mungesë të një mundësie të tillë, ai tha se Rusia do të vazhdojë të luftojë për të mbrojtur sigurinë e saj në dobi të brezave të ardhshëm.

“Pala ukrainase duhet ta dijë se herët a vonë do të duhet të negociojë, por nga një pozicion shumë më i keq. Pozicioni i regjimit të Kievit do të përkeqësohet dita-ditës”, tha Peskov.