Gjykata e Posaçme e Shkallës së Parë për Korrupsionin dhe Krimin e Organizuar ka vendosur sot të deklarojë të papranueshme kërkesën e ish-presidentit të Partisë së Lirisë, Ilir Meta, për zëvendësimin e masës së sigurisë “Arrest me burg” me një masë më të butë sigurimi.
Kërkesa ishte paraqitur më 2 mars 2026 nga Metaj, me objekt të ndryshojë masën e vendosur ndaj tij në kuadër të hetimeve për korrupsion, pastrim parash dhe mosdeklarim të pasurisë.
Në përfundim të shqyrtimit, trupi gjykues i përbërë nga gjyqtarja Irena Gjoka vendosi me vendimin nr. 200, datë 6 mars 2026:
Deklarimin e papranueshëm të kërkesës së Metajt, për shkak se përfaqësuesit ligjorë të tij vendosën të tërhiqen nga shqyrtimi i kërkesës.
Gjoka shtoi se palët kanë të drejtë të ankimojnë vendimin brenda pesë ditëve në Gjykatën e Posaçme të Apelit për Korrupsionin dhe Krimin e Organizuar, duke filluar nga dita e nesërme e njoftimit.
Ky vendim mban në fuqi masën e “Arrest me burg” për ish-presidentin e Partisë së Lirisë, duke e lënë të njëjtin nën mbikëqyrje të plotë ligjore, ndërsa hetimet ndaj tij vazhdojnë për përfshirjen e tij në dyshime për përfitime të dyshuara nga kontrata publike dhe lobime jashtë vendit.
Gjykata e Posaçme thekson se vendimi është marrë në përputhje me nenet 112 dhe 471, pika 5 të Kodit të Procedurës Penale dhe se ky është një hap i rëndësishëm në vijimësinë e procesit gjyqësor kundër Metajt dhe bashkëpandehurve të tij.
Për momentin, vendimi është i përfunduar në këtë shkallë, ndërsa çdo ankim mund të shqyrtohet nga Apeli i Posaçëm, duke hapur rrugë për shqyrtim të mëtejshëm ligjor.
