Çmimi i naftës ka rënë ndjeshëm pas deklaratave të presidentit amerikan Donald Trump se lufta me Iranin mund të përfundojë “shumë shpejt”. Nafta Brent, që kishte arritur pothuajse 120 dollarë për fuçi të hënën, ra sot në mëngjes në rreth 90 dollarë për fuçi, duke qetësuar përkohësisht tregjet energjetike.
Trump paralajmëroi gjithashtu Iranin të mos bllokojë Ngushticën e Hormuzit, një nga rrugët më të rëndësishme të transportit global të naftës dhe gazit, duke theksuar se SHBA do të godasë “njëzet herë më fort” nëse eksportet pengohen.
Nga ana tjetër, Garda Revolucionare iraniane reagoi duke deklaruar se nuk do të lejojë “eksportin e asnjë litri nafte nga rajoni”, duke shtuar tensionet në tregjet globale. Brent arriti të rikuperohej në rreth 93.76 dollarë për fuçi, ndërsa nafta amerikane WTI u rrit në 90.96 dollarë për fuçi.
Analistët e energjisë e përshkruajnë tregun si një “tërheqje litarësh”: çmimet mund të rriten shpejt nëse konflikti përshkallëzohet dhe të bien nëse tensionet ulen. Lëvizjet e çmimeve ndikuan pozitivisht në bursat aziatike, ku indeksi Nikkei u rrit me 2.9%, ndërsa Kospi në Korenë e Jugut me 5.4%.
Ngushtica e Hormuzit mbetet një pikë kyçe, pasi rreth një e pesta e naftës globale kalon përmes kësaj rruge. Vendet e G7 paralajmëruan se janë të gatshme të ndërhyjnë për të stabilizuar furnizimin global, përfshirë edhe përdorimin e rezervave strategjike, ndërsa Ministrja britanike e Financave, Rachel Reeves, bëri thirrje për ulje të menjëhershme të tensioneve dhe siguri për anijet që kalojnë në rajon.
Ekspertët theksojnë se situata mbetet e paqëndrueshme dhe çdo përshkallëzim i konfliktit mund të ndikojë menjëherë në çmimin global të energjisë.
