Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Ambasada Gjermane ka reaguar pas incidenteve të ndodhura gjatë protestës së zhvilluar një ditë më parë para Kryeministrisë, duke dënuar ashpër aktet e dhunës.
Në një postim në faqen zyrtare në Facebook, ambasada thekson se protestat politike dhe e drejta për të demonstruar janë të drejta themelore në çdo shoqëri demokratike, por nuk mund të përdoren si justifikim për dhunë ndaj personave apo objekteve.
“Ambasada Gjermane dënon dhunën e papranueshme në kuadër të demonstratave të djeshme. Protestat politike dhe e drejta për të demonstruar janë të drejta themelore në çdo shoqëri demokratike. Por ato nuk mund të përligjin asnjëherë dhunën ndaj personave apo objekteve,” thuhet në reagim.
Më tej, ambasada u bën thirrje përfaqësuesve të partive politike që të distancohen në mënyrë të qartë dhe të paekuivokë nga çdo akt dhune, duke theksuar rëndësinë e përgjegjshmërisë në situata të tilla.
Reagimi vjen në një kohë tensionesh politike, pas protestës së mbajtur përpara godinës së Kryeministrisë.
