Kryeministri Edi Rama ka reaguar ndaj gazetarit Eddy Wax pas publikimit të intervistës së ministrit të Jashtëm shqiptar, Ferit Hoxha, lidhur me marrëveshjen për emigrantët mes Shqipërisë dhe Itali.

Në një mesazh të publikuar në rrjetet sociale, Rama u shpreh se është “qesharake” të krijohet një përballje mes tij dhe gazetarit, duke theksuar se nuk ka bërë asnjë ankesë ndaj tij.

“I dashuri im Eddy Wax, e kuptoj plotësisht që është qesharake të krijosh një histori Edi kundër Eddy-t, por këtu nuk ka vend për këtë”, shkroi Rama.

Kreu i qeverisë tha se publikimi i plotë i transkriptit të intervistës ka treguar se citimi i shkurtuar i deklaratave ishte përdorur në mënyrë mashtruese.

“Tani që e keni botuar me bujari transkriptin e plotë, është shumë e qartë se citimi i reduktuar ishte mjaftueshëm mashtrues për këdo që ka një interes të brendshëm ideologjik ta përdorë atë”, u shpreh ai.

Rama shtoi se nuk ka asnjë ndjenjë negative ndaj gazetarit, duke ironizuar situatën me emrat e tyre të ngjashëm.

“Njëri Eddy duhet të bëjë çfarë të dojë, dhe tjetri Edi duhet të durojë atë që duhet”, shkroi kryeministri.

Në fund të reagimit të tij, Rama ritheksoi marrëdhënien e ngushtë mes Shqipërisë dhe Italisë, duke nënvizuar se bashkëpunimi mes dy vendeve mbetet i pandryshuar.

“Në fund të fundit, mbetet e pandryshuar: atë që Italia kërkon nga Shqipëria, Italia e merr nga Shqipëria”, përfundoi ai.