Një incident i rëndë është regjistruar këtë të hënë gjatë seancës paraprake në Gjykatën e Posaçme kundër Korrupsionit dhe Krimit të Organizuar (GJKKO), ku të pandehur janë Petrit Çarkaj dhe vëllezërit Aleksandër, Kristi dhe Fatjon Bushgjokaj, të akuzuar për vrasjen e 23-vjeçarit Renis Dobra.
Sipas informacioneve, tre vëllezërit Bushgjokaj kanë dhunuar fizikisht bashkë të pandehurin Petrit Çarkaj brenda kafazit të xhamtë të sallës së gjyqit, duke e gjakosur atë. Ngjarja ka ndodhur në momentin kur Çarkaj kishte nisur të jepte dëshminë e tij në seancën paraprake.
Seanca është zhvilluar pa praninë e mediave dhe drejtohej nga gjyqtari Bibë Ndreca. Pas incidentit, janë ndërprerë të gjitha seancat gjyqësore.
Të pandehurit akuzohen për rrëmbimin dhe vrasjen e Renis Dobrës, një ngjarje që tronditi opinionin publik një vit më parë. Sipas hetimeve, 23-vjeçari u mor peng, u mbyt dhe më pas u hodh së bashku me automjetin e tij në liqenin e Shkopetit. Dyshohet se motivi i krimit lidhej me prishjen e pazareve të drogës.
Pas ngjarjes, policia arrestoi në Tiranë vëllezërit Kristi dhe Aleksandër Bushgjokaj, të cilët akuzohen se kanë bashkëpunuar me vëllain e tyre Fatjon Bushgjokaj në ekzekutimin e të riut. Sipas organit të akuzës, pjesë e grupit që organizoi rrëmbimin dhe vrasjen ka qenë edhe Petrit Çarkaj, i cili u vu në pranga disa ditë pas krimit.
