Dasma luksoze e Donald Trump Jr. në Bahamas, e zhvilluar në maj në dy ishuj privatë, është kthyer në objekt të një hetimi të ri në SHBA, pasi rrjeti investigativ ProPublica raporton se një pjesë e konsiderueshme e shpenzimeve u pagua nga Umar Kremlev, një oligark rus i afërt me presidentin Vladimir Putin.
Sipas hetimit, Kremlev ka mbuluar me qindra mijëra dollarë shpenzimet për marrjen me qira të njërit prej ishujve privatë ku u zhvillua pritja dhe ku qëndruan të ftuarit. Ai dyshohet se ka paguar gjithashtu për fishekzjarrët, ndërsa ekipi i tij ka ndihmuar në organizimin e ceremonisë.
Dasma u zhvillua më 24 maj dhe zgjati tre ditë. Në festë morën pjesë rreth 50 persona, mes tyre Jared Kushner, bashkëshorti i Ivanka Trump, dhe Eric Trump.
Një nga detajet e ceremonisë ishte edhe një tortë pesëkatëshe funfetti, e cila u transportua me helikopter nga Florida.
Por pas luksit të ceremonisë, hetimi i ProPublica ka vënë në qendër të vëmendjes marrëdhënien mes Trump Jr. dhe Kremlevit, si dhe mënyrën se si u financuan shpenzimet e dasmës.
Kush është Umar Kremlev?
Umar Kremlev është president i Shoqatës Ndërkombëtare të Boksit (IBA), organizatë sportive e cila është përballur me një sërë polemikash dhe që, sipas ProPublica, ka pasur financim nga gjiganti shtetëror rus i energjisë Gazprom.
Kremlev ka lidhje të njohura me Vladimir Putinin. Vetëm një muaj para dasmës së Trump Jr., presidenti rus i dha atij Urdhrin e Miqësisë, një nga dekoratat shtetërore të Rusisë.
Pak ditë para dasmës, Kremlev ndodhej në Kinë në kuadër të delegacionit që shoqëronte Putinin, sipas mediave shtetërore kineze.
Ukraina e ka vendosur Kremlevin nën sanksione, duke përmendur lidhjet e tij me presidentin rus dhe shërbimet ruse të sigurisë.
Pagesat përmes një entiteti në Dubai
Sipas ProPublica, paratë për shpenzimet e dasmës nuk u paguan drejtpërdrejt nga Kremlev, por përmes një entiteti të lidhur me IBA-n në Dubai, të cilin organizata e përdor për transaksione financiare.
Hetimi e lidh këtë entitet me pagesat për marrjen me qira të ishullit dhe shpenzime të tjera të ceremonisë.
Prania e Kremlevit në dasmë ishte gjithashtu e pazakontë për një event kaq të vogël. Sipas raportimit, oligarku rus ishte pjesë e një grupi njerëzish që flisnin kryesisht rusisht dhe që qëndronin shpesh të veçuar nga pjesa tjetër e të ftuarve.
Ish-zyrtarët e FBI-së ngrenë alarmin
Zbulimi ka shkaktuar shqetësim te ish-zyrtarë të lartë amerikanë të kundërzbulimit.
Frank Montoya Jr., ish-zyrtar karriere i FBI-së, tha se financimi i një eventi personal nga një oligark rus mund të krijojë një situatë ku përfituesi ndihet i detyruar ndaj financuesit.
“Nëse unë po paguaj për dasmën tënde, në një moment, do të më kesh diçka borxh”, tha Montoya.
Sipas tij, oligarkët rusë shpesh veprojnë në koordinim me qeverinë e Moskës. Ai theksoi se nuk ka prova se kjo ka ndodhur në rastin e Trump Jr., por e cilësoi situatën si një pozicion veçanërisht të rrezikshëm për djalin e presidentit amerikan.
Edhe Holden Triplett, ish-drejtor i kundërzbulimit në Këshillin e Sigurisë Kombëtare gjatë mandatit të parë të Donald Trump, tha se inteligjenca ruse është e interesuar të krijojë lidhje me zyrtarët amerikanë dhe familjet e tyre.
“Paratë janë një metodë e provuar dhe e vërtetë për të fituar akses”, tha Triplett.
Trump Jr.: “Umar është mik personal”
Zëdhënësi i Donald Trump Jr. nuk i mohoi pagesat e Kremlevit për dasmën.
Ai e përshkroi oligarkun rus si “një mik personal të Donit” dhe tha se Trump Jr. nuk ka marrëdhënie biznesi me të.
Sipas zëdhënësit, të dy janë njohur përmes një miku të përbashkët në rrethet e gjuetisë dhe janë afruar për shkak të interesit të përbashkët për boksin dhe aktivitetet në natyrë.
Edhe zyra e shtypit e Kremlevit konfirmoi marrëdhënien mes dy burrave, duke deklaruar se ata kanë një “marrëdhënie miqësore” dhe se janë njohur për herë të parë “disa vite më parë”.
Deri tani, nuk ka prova publike se pagesat e Kremlevit janë bërë në këmbim të ndonjë favori politik apo qeveritar.
Megjithatë, raportimi i ProPublica rikthen në vëmendje një çështje që ka ndjekur familjen Trump prej vitesh, kontaktet dhe marrëdhëniet financiare me persona të lidhur me elitën ruse, në një kohë kur Rusia është konsideruar nga Uashingtoni si një nga kundërshtarët kryesorë të SHBA-së.
Pikërisht për këtë arsye, financimi i një eventi privat të familjes së presidentit amerikan nga një oligark i afërt me Vladimir Putinin po shihet me shqetësim nga ish-zyrtarë të kundërzbulimit amerikan.
