Tensionet mes Rusisë dhe një vendi të NATO-s janë përshkallëzuar në Detin Baltik, pasi një fregatë ruse ka lëshuar dy raketa sinjalizuese në drejtim të një helikopteri ushtarak danez.
Incidenti ndodhi më 14 shtator në ujëra ndërkombëtare, pranë Gedserit, në jug të Danimarkës. Helikopteri danez Fennec po kryente një mision rutinë fotografik ndaj anijes ruse kur u lëshuan dy flakadanët. Sipas Komandës së Mbrojtjes Daneze, njëri prej tyre kaloi në një distancë shumë të afërt me helikopterin.
Nuk raportohet për të plagosur apo dëme në helikopter.
Danimarka reagoi ashpër ndaj incidentit. Kryeministrja Mette Frederiksen e cilësoi veprimin rus si “të pamatur”, ndërsa ministri i Jashtëm Lars Løkke Rasmussen tha se incidenti ishte i papranueshëm dhe mund të kishte rrezikuar jetën e ekuipazhit.
Kopenhaga ka thirrur edhe ambasadorin rus për t’i kërkuar shpjegime lidhur me ngjarjen.
Nga Moska ka ardhur një version tjetër i ngjarjes. Ambasadori rus në Kopenhagë ka paraqitur një protestë zyrtare, duke akuzuar helikopterët danezë për kryerjen e manovrave të rrezikshme pranë anijeve ruse.
Rusia pretendon se fluturimet daneze kanë qenë provokuese dhe se veprimet e ekuipazheve mund të kenë krijuar rrezik për sigurinë e anijeve.
Incidenti vjen në një periudhë kur vendet e NATO-s në krahun lindor dhe verior të Europës kanë rritur vigjilencën për aktivitetin ushtarak rus në rajon.
Në të njëjtën kohë, tensionet në Baltik janë shtuar edhe nga incidente të tjera ajrore. Më 15 shtator, avionë të NATO-s rrëzuan një dron që kishte hyrë në hapësirën ajrore të Lituanisë, duke shtuar shqetësimet për sigurinë e vendeve anëtare të aleancës.
Përplasja mes fregatës ruse dhe helikopterit danez nuk ka kaluar në një konfrontim të drejtpërdrejtë, por fakti që një flakadan kaloi pranë një avioni ushtarak të një vendi të NATO-s ka rritur shqetësimet për rrezikun e një incidenti më serioz në një nga zonat më të ndjeshme ushtarake të Europës.
Me luftën në Ukrainë ende në vazhdim dhe me shtimin e incidenteve ushtarake në hapësirën e NATO-s, çdo përplasje e re në Baltik shihet me vëmendje të veçantë nga aleatët.
