Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Kryeministri Edi Rama njoftoi shpërblim prej 2,500 eurosh për çdo punonjës policie të angazhuar në vijën e përballjes me protestuesit, ndërsa premtoi edhe rritje të konsiderueshme të pagave nga 1 janari 2027.
Por burimi konkret i financimit të këtij shpërblimi nuk është bërë ende publik në dokumentet e identifikuara.
Gjatë një takimi me drejtues të Policisë së Shtetit, Rama deklaroi se masa synon të mbështesë punonjësit e angazhuar në përballjen me protestuesit, duke përmendur stresin dhe shpenzimet shtesë me të cilat, sipas tij, përballen efektivët në këto situata.
“Ne do vëmë në dispozicion një shumë prej 2500 eurosh, për çdo efektiv në front. E vendosëm kështu, për të mos bërë asnjë diferencë. Jeni një, dhe një për të gjithë”, u shpreh Rama.
Kryeministri njoftoi gjithashtu se pagat e punonjësve të Policisë së Shtetit do të rriten në mënyrë të konsiderueshme nga 1 janari 2027, duke iu referuar buxhetit të ri.
Deklarata e Ramës ngre pikëpyetje mbi koston e përgjithshme të masës, numrin e përfituesve dhe, mbi të gjitha, burimin buxhetor nga i cili do të financohet shpërblimi.
Buxheti i Policisë për vitin 2026, 29.6 miliardë lekë
Sipas raportimeve mbi projektbuxhetin e vitit 2026, fondi i parashikuar për Policinë e Shtetit ishte rreth 29.6 miliardë lekë.
Nga kjo shumë, rreth 19.9 miliardë lekë ishin planifikuar për personelin, përfshirë pagat dhe sigurimet, ndërsa rreth 2.2 miliardë lekë për investime kapitale.
Buxheti i shtetit për vitin 2026 u miratua nga Kuvendi më 12 dhjetor 2025, ndërsa gjatë vitit u ndërhynë ndryshime përmes Aktit Normativ nr. 2, datë 30 qershor 2026.
Këto të dhëna tregojnë se financimi i Policisë është përcaktuar në kuadrin e buxhetit vjetor dhe është ndryshuar më pas. Megjithatë, në dokumentet e identifikuara deri tani nuk rezulton një zë i përcaktuar shprehimisht për shpërblimin prej 2,500 eurosh të njoftuar sot nga kryeministri.
Në korrik, 701 milionë lekë shtesë për Policinë
Më 8 korrik 2026, Ministria e Brendshme njoftoi rritjen me 701 milionë lekë të financimit për Policinë e Shtetit, përmes ndryshimeve në buxhetin e vitit 2026.
Ndërkohë, sipas Ministrisë së Financave, në kuadër të ndryshimeve buxhetore u parashikuan rreth 704 milionë lekë shtesë për Ministrinë e Brendshme, të ndara në disa zëra.
Nga kjo shumë, 278 milionë lekë ishin parashikuar për Policinë e Shtetit për efektet e indeksimit dhe shtesat mbi pagë, 100 milionë lekë për mirëmbajtjen e sistemit Live Scanner, 258 milionë lekë për shërbimet e Gjendjes Civile dhe 28 milionë lekë për AAPSK-në dhe prefekturat.
Këto fonde ishin parashikuar për qëllimet e përcaktuara në dokumentet buxhetore. Deri tani nuk ka një konfirmim se ndonjë pjesë e tyre do të përdoret për shpërblimin e ri prej 2,500 eurosh për efektiv.
Sa mund të kushtojë shpërblimi?
Kostoja totale e premtimit do të varet nga numri i efektivëve që do të përfitojnë pagesën.
Nëse shpërblimi prej 2,500 eurosh do t’u jepet 1,000 efektivëve, fatura do të ishte 2.5 milionë euro. Për 2,000 efektivë, kostoja do të arrinte në 5 milionë euro, ndërsa për 3,000 efektivë do të shkonte në 7.5 milionë euro.
Këto janë vetëm përllogaritje hipotetike. Numri zyrtar i përfituesve dhe kostoja përfundimtare nuk janë bërë të ditur në deklaratën e kryeministrit.
Nga cili fond do të paguhen 2,500 eurot?
Pyetja kryesore mbetet nëse shpërblimi do të financohet nga fondet ekzistuese të Policisë së Shtetit, nga një rialokim brenda buxhetit të Ministrisë së Brendshme apo nga një fond tjetër i autorizuar nga qeveria.
Pyetjet që kërkojnë përgjigje janë: Sa efektivë do ta marrin shpërblimin? Sa është fatura totale? Nga cili zë buxhetor do të paguhet? Dhe a do të ketë një vendim të posaçëm apo ndryshim tjetër buxhetor për ta bërë të mundur pagesën?
