Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Kryetari i Partisë Demokratike, Sali Berisha, deklaroi se opozita përfaqëson “shpresën e vetme” për shpëtimin e Shqipërisë nga ajo që e cilësoi si “narkoshtet i Edi Ramës”, gjatë një proteste të zhvilluar me mbështetësit e saj.
Në fjalën e mbajtur para qytetarëve, Berisha tha se tubimi nuk ishte thjesht një protestë e radhës, por pjesë e një lëvizjeje më të gjerë që synon përballjen me atë që ai e quajti regjim autokratik. Ai theksoi se opozita po zhvillon një “serial të fuqishëm protestash” dhe një “kryengritje paqësore”, të cilën e konsideroi ndër më të mëdhatë në dekadat e fundit.
Sipas tij, pjesëmarrja masive në protestat e opozitës tregon mbështetjen e qytetarëve, ndërsa mungesa e pjesëmarrjes në protesta të tjera lidhet me klimën e frikës në vend. Berisha akuzoi qeverinë për ushtrim presioni ndaj qytetarëve përmes vendeve të punës, bizneseve dhe institucioneve shtetërore.
Ai ngriti shqetësimin për rritjen e çmimeve, veçanërisht të karburanteve, duke theksuar se ato janë ndër më të lartat në Europë, ndërkohë që pagat dhe pensionet mbeten të ulëta në krahasim me rajonin.
Në përfundim, Berisha u bëri thirrje qytetarëve që të bashkohen në protestat e opozitës, duke theksuar se vetëm përmes mobilizimit qytetar mund të arrihet ndryshimi politik në vend.
