Irlanda mori të mërkurën presidencën e radhës të Këshillit të Bashkimit Evropian, duke nisur një mandat gjashtëmujor që do të përqendrohet në forcimin e sigurisë, rritjen e konkurrueshmërisë dhe mbrojtjen e vlerave demokratike, sipas një deklarate të Këshillit.
Ajo pason Administratën Greko-Qipriote, e cila ushtroi presidencën gjatë gjysmës së parë të vitit 2026, ndërsa më 1 janar të vitit 2027 drejtimin do ta marrë Lituania.
Me marrjen e presidencës, Irlanda inauguron edhe programin 18-mujor të “Trio Presidencës”, së bashku me Lituaninë dhe Greqinë, në përputhje me Axhendën Strategjike të Bashkimit Evropian për periudhën 2024-2029.
Në deklaratë thuhet se trioja e re e presidencës, që shtrihet nga brigjet atlantike të Irlandës, te rajoni baltik i Lituanisë dhe porta mesdhetare e Greqisë, mishëron frymën dhe unitetin e projektit evropian.
Po ashtu, theksohet se tre shtetet sjellin histori, përvoja dhe këndvështrime të ndryshme, të bashkuara nga diversiteti dhe të orientuara drejt një përgjegjësie dhe objektivi të përbashkët.
Programi i përbashkët i presidencës bazohet në tre shtylla kryesore: promovimin e një Evrope të lirë dhe demokratike, forcimin e një Evrope të sigurt dhe të qëndrueshme, si dhe zhvillimin e një Evrope më të begatë dhe më konkurruese.
