Andi Deda është emëruar në drejtimin e Komisariatit të Policisë Vlorë, duke lënë detyrën e shefit të Komisariatit të Policisë Shijak.
Emërimi i Dedës vjen në kuadër të ndryshimeve organizative që po zhvillohen në disa struktura të Policisë së Shtetit, ku janë përfshirë komisariate dhe drejtori vendore në qarqe të ndryshme të vendit.
Deda është një emër i njohur në radhët e strukturave ligjzbatuese. Gjatë karrierës së tij ai ka mbajtur poste të ndryshme drejtuese, ndërsa më herët ka qenë në krye të Shërbimit të Kontrollit të Brendshëm në sistemin e burgjeve, institucion që më pas u riorganizua në strukturën aktuale të kontrollit të brendshëm.
Pas përvojës në këtë sektor, Deda u rikthye në radhët e Policisë së Shtetit, ku mori drejtimin e Komisariatit të Policisë Shijak. Gjatë kësaj periudhe ai drejtoi strukturën vendore të policisë në një zonë me specifika të veçanta sa i takon rendit dhe sigurisë publike.
Transferimi i tij në Vlorë shihet si pjesë e një riorganizimi më të gjerë të strukturave drejtuese të Policisë së Shtetit. Burime pranë strukturave të rendit bëjnë me dije se procesi i ndryshimeve pritet të vijojë edhe në ditët në vijim, me emërime dhe transferime të tjera në nivele të ndryshme drejtuese.
Komisariati i Policisë Vlorë është një prej strukturave me rëndësi në vend, për shkak të shtrirjes territoriale, fluksit të lartë turistik dhe sfidave të menaxhimit të rendit publik gjatë gjithë vitit.
Me emërimin e ri, Andi Deda merr drejtimin e kësaj strukture në një periudhë kur Policia e Shtetit po ndërmerr ndryshime në drejtim të riorganizimit dhe forcimit të kapaciteteve drejtuese në terren.
