Indeksi i Kushtimit në Ndërtim për tremujorin e tretë të vitit 2025 ka arritur në 114, duke shënuar një rritje vjetore prej vetëm 1.4%. Të dhënat tregojnë se çmimet në ndërtim nuk po rriten më me të njëjtin ritëm si më parë.

Analiza sipas grupeve kryesore tregon se rritja më e madhe është tek shpenzimet për paga, me një rritje prej 6.6%, duke sinjalizuar një shtim të kostos së fuqisë punëtore në sektor. Shpenzimet për makineri dhe kostot e tjera kanë shënuar rritje prej 2.4%, ndërsa transporti ka rritur kostot me 1.7%. Në të kundërt, materialet e ndërtimit kanë pësuar një ulje prej 0.6%, duke zbutur disi presionin mbi koston totale.

Në përgjithësi, të dhënat tregojnë një rritje të moderuar të kostove në sektor, kryesisht e nxitur nga paga dhe shpenzimet operacionale, ndërsa ulja e çmimeve të materialeve ka kontribuar në lehtësimin e presionit financiar.

Indeksi i Kushtimit mat ecurinë e çmimeve të materialeve, fuqisë punëtore dhe shpenzimeve kapitale të nevojshme për ndërtimin e një banese tip. Ai konsiderohet një tregues kyç për performancën dhe trendet e sektorit të ndërtimit.