Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Grupi Parlamentar i Partisë Demokratike ka dorëzuar në Gjykatën Kushtetuese dy padi të veçanta, duke kërkuar shfuqizimin e aktit të mazhorancës dhe një dekreti presidencial, të cilat sipas saj janë në kundërshtim me Kushtetutën.
Shfuqizimi i ndryshimeve në Rregulloren e Kuvendit
Në padinë e parë, PD kërkon shfuqizimin e ndryshimeve të njëanshme në Rregulloren e Kuvendit të kryera nga mazhoranca. Partia opozitare argumenton se këto ndryshime cenojnë funksionimin demokratik dhe parimet e barazisë në Kuvend, duke dhënë përparësi të paligjshme grupeve të caktuara parlamentare dhe duke minuar rolin e opozitës.
Shfuqizimi i dekretit “Diella”
Padia e dytë i referohet dekretit të Presidentit për krijimin dhe funksionimin e Ministrit Virtual të Inteligjencës Artificiale “Diella”. Partia Demokratike e konsideron këtë dekret antikushtetues, duke argumentuar se krijimi i një strukture qeveritare virtuale tejkalon kompetencat ligjore dhe cenon procedurat e miratuara për administrimin e institucioneve shtetërore.
Ky veprim i Partisë Demokratike vjen pas tensioneve të fundit në Kuvend, ku opozita ka denoncuar një sërë vendimesh të mazhorancës si njëanshme dhe të kundërta me rregullat demokratike. Paditë në Gjykatën Kushtetuese do të vendosin nëse aktet e përmendura janë në përputhje me Kushtetutën apo jo.
