Etleva Skonja
Aeroporti Ndërkombëtar i Vlorës, një projekt madhor me vlerë 104 milionë euro, është në qendër të një konflikti të thellë mes aksionarëve dhe dyshimeve për ndërhyrje të qeverisë. Ky investim, i cili ka nisur operimin e tij në vitin 2025, është një nga projektet më të mëdha të infrastrukturës në Shqipëri.
Përplasja mes aksionerëve
Kompania “Mabco Constructions”, pjesë e grupit Mabetex të Behgjet Pacollit, ka marrë kontrollin e 98% të aksioneve të Aeroportit të Vlorës, duke blerë aksionet e kompanisë turke YDA për vetëm 4,450 euro.
Kjo ka shkaktuar një përplasje me kompaninë 2A Group të Valon Ademit, e cila ka investuar 25 milionë euro në ndërtimin e aeroportit. Ademi ka akuzuar Pacollin për mashtrim dhe manipulim të aksioneve, duke e quajtur këtë veprim një “lojë të rrezikshme” që mund të ketë pasoja ligjore.
Paraprakisht, Pacolli mohoi konfliktet për aeroportin e Vlorës.
Ai i konsideroj aludimet “të padrejta dhe të shtrembëruara”, duke theksuar se vizita e tij në Kryeministri ishte për qëllime raportimi dhe jo për presion politik.
Sipas aeroporti “po hyn në një fazë të re zhvillimi profesional”, teksa theksoi se riorganizimi i brendshëm është një procedurë rutinë menaxheriale, pa lidhje me politikanët apo spekulimet
Më tej, Pacolli sqaroi se kufizimi i shitjes së aksioneve është një masë garantuese financiare, që lidhet me kredinë e marrë dhe nuk ka qëllim tjetër veçse të mbrojë investimin.
Por situate duket të jetë tërësisht ndryshe, pas reagimit të Valon Ademit.
Roli i Qeverisë dhe dyshimet për favorizim
Qeveria shqiptare ka nënshkruar një kontratë koncesionare 35-vjeçare me konsorciumin fitues për ndërtimin e aeroportit. Kjo kontratë parashikon një investim privat prej 103.9 milionë eurosh, ndërsa shteti merr përsipër të garantojë të ardhura minimale për operatorin nëse ato janë më të ulëta se 140 milionë euro gjatë 10 viteve të para. Kjo shihet si një favorizim i tepruar i investitorëve dhe një rrezik për buxhetin shtetëror.
Para katër viteve kur nisi gjithçka, kryeministri Edi Rama,deklaroi se përfshirja e një kompanie të madhe me pronar shqiptar do ta bëjë qeverinë më kërkuese si për sa i përket cilësisë ashtu edhe shpejtësisë së punimeve.
Ndërsa, sipas ministres Belinda Balluku,Kompania ka përvojë të shkëlqyer me mbi 6 aeroporte të ndërtuara në botë dhe ka forcë financiare.
Aktualisht, ka dyshime për pasiguri ligjore në lidhje me ndarjen e aksioneve dhe investimet e bëra. Kjo mësohet se ka çuar në hetime nga SPAK, të cilat janë ende në zhvillim.
Konflikti mes aksionarëve të Aeroportit të Vlorës, së bashku me dyshimet për ndërhyrje të qeverisë dhe pasigurinë ligjore, kanë ngritur shqetësime për transparencën dhe menaxhimin e këtij projekti strategjik. Hetimet e vazhdueshme dhe monitorimi i kujdesshëm i zhvillimeve janë të nevojshme për të siguruar që ky investim të shërbejë interesave të qytetarëve dhe zhvillimit të qëndrueshëm të rajonit.
