Avokati dhe analisti politik Ylli Manjani komentoi sot ankimin e kryebashkiakut të Tiranës, Erion Veliaj, në Gjykatën Kushtetuese kundër vendimit për shkarkimin e tij. Sipas Manjanit, ankesa e Veliajt është e drejtë e tij ekskluzive dhe nuk ka lidhje me debatet politike, por lidhet me mbrojtjen e të drejtave kushtetuese dhe sundimin e ligjit.

Manjani theksoi se zgjedhja e Veliajt për të mbrojtur veten nuk e justifikon opozitën, e cila sipas tij nuk ka ende kandidat për Bashkinë e Tiranës, pavarësisht protestave të shumta kundër kryebashkiakut. “Ankimi i Veliajt nuk justifikon paaftësinë fatale të PD-së për të marrë pjesë në zgjedhje”, tha ai, duke kritikuar mungesën e përgatitjes së opozitës dhe logjikën e saj politike.

Analisti shtoi se çdo opozitë normale duhet të ketë emra të gatshëm për çdo situatë dhe nuk duhet të harxhojë energji me procedura, afate ligjore, padi apo ankesa, duke theksuar se raportet e ODIHR nuk ndikojnë politikisht në veprimet e saj.

Manjani nënvizoi se Veliaj ka vepruar brenda të drejtave të tij, ndërsa sfida mbetet tek opozita për të ofruar alternativa reale për qytetarët e Tiranës.