Gazetari i “Kathimerini” e cilësoi situatën si paradoksale, duke theksuar se, ndërsa Shqipëria shënon rritje ekonomike, rreth 500 mijë qytetarë janë larguar nga vendi gjatë viteve të qeverisjes së Ramës.

Në përgjigjen e tij, kreu i qeverisë kundërshtoi këtë shifër, duke e cilësuar të pasaktë, por pranoi se emigracioni mbetet një realitet. Sipas tij, largimi i shqiptarëve është një fenomen i kuptueshëm për një vend që ka kaluar dekada izolimi.

Rama theksoi se, megjithëse bilanci mbetet negativ, ka shenja të qarta se gjithnjë e më shumë shqiptarë po rikthehen në vend, ndërsa diferenca mes atyre që largohen dhe atyre që kthehen po ngushtohet.

Ai solli në vëmendje disa tregues ekonomikë, duke theksuar se Prodhimi i Brendshëm Bruto është rritur nga më pak se 10 miliardë euro në rreth 27 miliardë euro, ndërsa numri i turistëve ka arritur në 12 milionë gjatë vitit të kaluar. Po ashtu, investimet e huaja direkte janë rritur ndjeshëm, duke arritur në 1.6 miliardë euro.

Sipas kryeministrit, këto zhvillime tregojnë progresin e bërë nga vendi, megjithëse ai pranoi se ka ende shumë punë përpara në rrugën drejt integrimit evropian.