Kursi i këmbimit mes Euros dhe Lekut ka vijuar rënien gjatë kësaj jave, duke arritur një tjetër rekord historik. Sipas kursit zyrtar të publikuar nga Banka e Shqipërisë, monedha europiane është këmbyer me 95.49 lekë, niveli më i ulët i regjistruar ndonjëherë.
Që nga fillimi i vitit, Euro ka humbur rreth 1.3% të vlerës ndaj Lekut, ndërsa në krahasim me të njëjtën periudhë të një viti më parë rënia arrin në 3.3%. Sipas agjentëve të tregut valutor, tremujori i dytë i vitit ka shtuar presionet nënçmuese mbi monedhën europiane, kryesisht si pasojë e rritjes së flukseve nga turizmi.
Gjatë vitit 2026, Leku ka shfaqur një forcim të pazakontë që në tremujorin e parë, një zhvillim që nuk është vërejtur shpesh në të dhënat historike. Oferta e lartë e valutës në treg dhe kërkesa relativisht e dobët për të kanë ndikuar në vijimin e rënies së Euros.
Ndërkohë, Banka e Shqipërisë ka ndërhyrë rregullisht në treg duke blerë Euro, në përpjekje për të frenuar forcimin e mëtejshëm të Lekut. Sipas statistikave zyrtare, gjatë vitit të kaluar banka qendrore ka blerë mbi 1 miliard euro, një rritje prej 10% krahasuar me një vit më parë.
Edhe për vitin aktual, institucioni parashikon të rrisë ndërhyrjet, duke synuar blerjen e 330 deri në 450 milionë euro përmes ankandeve, me qëllim forcimin e rezervës valutore.
Megjithatë, pavarësisht këtyre ndërhyrjeve dhe rritjes së ofertës monetare në Lek, monedha vendase vijon të forcohet, duke reflektuar një prirje të qëndrueshme të tregut në favor të saj.
