Një shpërthim i dyshuar sëmundjeje në anijen turistike MV Hondius ka shkaktuar alarm ndërkombëtar, pasi deri më tani janë regjistruar tre viktima dhe një tjetër pasagjer ndodhet në gjendje kritike.

Anija, e nisur më 20 mars nga Ushuaia drejt Kepi i Gjelbër, duhej të ankorohej më 4 maj, por aktualisht po përballet me një situatë serioze shëndetësore në bord.

Mes pasagjerëve ndodhet edhe blogeri amerikan Jake Rosmarin, i cili ka ndarë pamje dhe dëshmi nga anija, duke e përshkruar situatën si dramatike dhe të mbushur me pasiguri. Ai theksoi se pasagjerët kërkojnë transparencë dhe kthim të sigurt në vendet e tyre, ndërsa konfirmoi se gjendja e tij është e qëndrueshme.

Sipas kompanisë Oceanwide Expeditions, në bord ndodhen 149 persona, kryesisht nga Britania e Madhe, SHBA dhe Spanja. Ndër viktimat janë një çift holandez dhe një shtetas gjerman. Njëri prej viktimave shfaqi simptoma të menjëhershme si ethe, dhimbje koke dhe probleme gastrointestinale, ndërsa bashkëshortja e tij ndërroi jetë më vonë në spital në Afrika e Jugut.

Një pasagjer britanik ndodhet në gjendje kritike në Johanesburg dhe është rasti i vetëm i konfirmuar deri tani me infeksion nga Hantavirusi. Dy raste të tjera mbeten të dyshuara dhe janë në proces verifikimi.

Organizata Botërore e Shëndetësisë ka bërë të ditur se hetimet janë në vijim, ndërsa analizat laboratorike dhe epidemiologjike synojnë të përcaktojnë shkakun e saktë të shpërthimit. Paralelisht po kryhet edhe sekuencimi gjenetik i virusit.

Autoritetet kanë urdhëruar izolimin e pasagjerëve në kabina për të frenuar përhapjen, ndërsa janë duke u organizuar operacione evakuimi për rastet me simptoma. Po shqyrtohen gjithashtu opsione për ankorim në Las Palmas ose Tenerife, megjithëse ende nuk ka një kërkesë zyrtare.

Situata në bord mbetet e tensionuar dhe nën monitorim të vazhdueshëm nga autoritetet shëndetësore dhe detare ndërkombëtare.