Ish-ministri i Drejtësisë, Ylli Manjani, ka reaguar lidhur me debatet e fundit për mënyrën se si po funksionon drejtësia e posaçme në Shqipëri, duke u ndalur veçanërisht te kritikat ndaj SPAK dhe te përgjegjësia e Kryeministrit për të ndërhyrë me zgjidhje konkrete.
Në një reagim publik, Manjani shprehet se Kryeministri ka të drejtë kur ngre shqetësime për mënyrën se si SPAK përdor mediat dhe për ekspozimin publik të personave që ende nuk janë gjykuar.
Sipas ish-ministrit të Drejtësisë, problematikë është edhe mënyra e marrjes së vendimeve nga gjyqtarët dhe prokurorët e posaçëm, veçanërisht kur ato prekin lirinë, reputacionin dhe autoritetin e individëve apo edhe të institucioneve të tjera.
“Por pyetja është: po pastaj?”, shkruan Manjani, duke e zhvendosur fokusin nga konstatimet te përgjegjësia për të ndërmarrë hapa konkretë.
Sipas tij, nëse kritikat ndaj mënyrës së funksionimit të drejtësisë së posaçme janë serioze dhe madje alarmante për një shtet kushtetues, atëherë ato nuk mund të mbeten vetëm deklarata publike.
Manjani argumenton se Kryeministri nuk mund të sillet thjesht si një analist që evidenton problemet, pasi, sipas tij, ai është zyrtari më i fuqishëm politik në vend dhe ka në dispozicion mekanizma institucionalë për të propozuar ligje, reforma dhe ndryshime.
“Roli i tij nuk është të bëjë diagnozën, por të nisë trajtimin”, shkruan ish-ministri i Drejtësisë.
Një pjesë e rëndësishme e reagimit të Manjanit lidhet me atë që ai e konsideron si një kontradiktë në qëndrimet e Kryeministrit ndaj Reformës në Drejtësi.
Sipas tij, për vite me radhë Kryeministri e ka mbrojtur reformën dhe e ka konsideruar një prej arritjeve të tij më të rëndësishme politike. Ndërsa sot, sipas Manjanit, ai po kritikon institucionet e krijuara në kuadër të kësaj reforme, duke ngritur pikëpyetje mbi mënyrën se si ato funksionojnë.
“Padyshim që ka një kundërthënie të dukshme tashmë në deklarimet e tij”, shprehet Manjani, duke argumentuar se problemi nuk mund të konsiderohet më thjesht një devijim i vogël, por një çështje që prek vetë funksionimin e Reformës në Drejtësi.
Ish-ministri ndalet edhe te respektimi i lirive dhe garancive kushtetuese, duke ngritur shqetësime për procesin e rregullt ligjor.
Sipas Manjanit, problemet me respektimin e këtyre standardeve janë evidentuar edhe në raste të shqyrtuara nga Gjykata Evropiane e të Drejtave të Njeriut.
Në vijim të reagimit, ai ngre një tjetër pikëpyetje: çfarë do të ndodhë pasi problemet të jenë evidentuar?
Manjani pyet nëse do të vazhdohet t’u lihet institucioneve të drejtësisë së posaçme një hapësirë e tillë veprimi apo nëse do të ndërmerren masa për të rishikuar mekanizmat që, sipas tij, kanë lejuar krijimin e një sistemi me mungesë transparence dhe llogaridhënieje.
Ai e sheh si problem jo vetëm ekzistencën e drejtësisë së posaçme, por edhe mënyrën se si ajo ushtron kompetencat e saj.
“Me maska nuk ndërtohet as ligj, as drejtësi, e aq më pak një shtet që pretendon të bëhet anëtar i Bashkimit Evropian”, shkruan Manjani.
Ish-ministri thekson se pa respektimin e procesit të rregullt ligjor nuk mund të garantohet drejtësia, pasi ekziston rreziku që një person i pafajshëm të trajtohet si fajtor, ndërsa një i akuzuar të mos përballet me një proces që garanton standardet kushtetuese.
Manjani propozon që diskutimi të kalojë nga kritikat te veprimet konkrete.
Sipas tij, një hap i parë mund të ishte pranimi publik i problemeve dhe më pas ndërmarrja e një nisme për rishikimin e mekanizmave që kanë lejuar, sipas tij, deformime në funksionimin e sistemit të drejtësisë.
“Duhen zgjidhje, jo më gjetje”, përfundon Manjani, duke ia atribuar Kryeministrit përgjegjësinë për të ndërmarrë hapat e nevojshëm pas kritikave të bëra ndaj sistemit të drejtësisë.
