Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Eloida Goxhaj, Antoneta Sevdari dhe Afërdita Ndoi janë zgjedhur anëtare të reja të Këshillit të Lartë të Prokurorisë (KLP), organit kushtetues që drejton dhe mbikëqyr aspekte të rëndësishme të karrierës së prokurorëve në Shqipëri.
Zgjedhja e tre anëtareve vjen në kuadër të rinovimit të përbërjes së Këshillit, me përfundimin e mandateve të anëtarëve aktualë. Përmes këtij procesi synohet të sigurohet vijimësia e punës së institucionit dhe përfaqësimi i prokurorëve në organin e qeverisjes së sistemit të prokurorisë.
Këshilli i Lartë i Prokurorisë ka kompetenca që lidhen me emërimin, vlerësimin, ngritjen në detyrë dhe statusin e prokurorëve, si dhe me procedurat për përzgjedhjen e kandidaturave për Prokuror të Përgjithshëm.
Ndryshimet në përbërjen e KLP-së marrin rëndësi edhe për shkak të procesit të përzgjedhjes së Prokurorit të Përgjithshëm, ku janë në garë pesë kandidatë. Pas disa javësh bllokim për shkak të kërkesave të ndërsjella për përjashtimin e anëtarëve, më 8 tetor Këshilli rrëzoi me shumicë votash këto kërkesa, duke i hapur rrugë vijimit të procedurës.
Përbërja e re e Këshillit do të jetë pjesë e vendimmarrjeve të ardhshme për karrierën e prokurorëve dhe funksionimin e sistemit të prokurorisë.
