Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Rregullorja e re e Gjykatës së Posaçme kundër Korrupsionit dhe Krimit të Organizuar (GJKKO), e cila hyri në fuqi më 1 shtator 2026, vendos kufizime për përdorimin e telefonave celularë dhe pajisjeve të tjera elektronike në sallat e gjykimit. Megjithatë, gjatë seancës së 13 tetorit ndaj kryebashkiakut të Tiranës, Erion Veliaj, u raportua një incident që ngre pikëpyetje mbi zbatimin e këtyre rregullave.
Sipas raportimeve mediatike, gjatë seancës telefonit të prokurorit të posaçëm Ols Dado i ra zilja. Raportohet se prokurori e nxori pajisjen nga xhepi dhe e mbylli menjëherë thirrjen. Sipas të njëjtave raportime, trupi gjykues nuk reagoi ndaj incidentit.
Çfarë parashikon rregullorja për telefonat?
Rregullorja e brendshme e GJKKO-së, e miratuar me vendimin nr. 49, datë 17 korrik 2026, përcakton rregullat për sigurinë, rendin dhe sjelljen në ambientet e gjykatës.
Sipas sqarimeve të publikuara nga vetë gjykata, përdorimi i telefonave celularë në sallën e gjykimit nuk lejohet. Kufizimi zbatohet për të gjithë personat e pranishëm, përfshirë gjyqtarët, prokurorët, avokatët dhe gazetarët. Përjashtime parashikohen për përdorimin e disa pajisjeve elektronike në funksion të detyrave procedurale, si laptopët që mund të përdoren nga prokurorët dhe avokatët për ushtrimin e funksioneve të tyre.
Rregullorja parashikon gjithashtu kufizime për fotografimin dhe filmimin në ambientet e gjykatës, ndërsa realizimi i regjistrimeve audiovizive të seancave publike mund të bëhet nga vetë gjykata dhe materialet mund t’u vihen në dispozicion mediave me vendim të trupit gjykues.
Rregulla të njëjta, zbatim për të gjithë?
Ndalimi i telefonave ka qenë një nga pikat kryesore të konfliktit mes GJKKO-së dhe avokatëve, të cilët kanë kundërshtuar kufizimet e vendosura nga rregullorja dhe kanë bojkotuar seancat gjyqësore.
Në rastin e seancës ndaj Veliajt, avokatët u gjobitën me nga 100 mijë lekë të reja për mungesën, ndërsa SPAK kërkoi që gjykimi të vijojë edhe pa ta, nëse mungesat vazhdojnë.
Në këtë aspekt, incidenti me telefonin e prokurorit ngre pikëpyetjen nëse rregullorja zbatohet njësoj për të gjithë pjesëmarrësit në proces.
