Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Ftesa e kreut të Partisë Demokratike, Sali Berisha, për të bashkuar forcat me Adriatik Lapajn, Agron Shehajn dhe Arlind Qorin me synimin për largimin e kryeministrit Edi Rama është refuzuar nga të tre drejtuesit e partive opozitare.
Të ftuar në emisionin “Të Paekspozuarit” në Vizion Plus, ata përjashtuan mundësinë e një bashkëpunimi politik me Berishën, duke argumentuar secili qëndrimin e tij. Deklaratat vijnë pasi kryedemokrati, në një intervistë për emisionin “Now me Erla Mëhillin”, u bëri thirrje partive të tjera opozitare të bashkohen për të rrëzuar qeverinë.
Kreu i “Shqipëria Bëhet”, Adriatik Lapaj, deklaroi se largimi nga skena politike duhet të përfshijë si Edi Ramën, ashtu edhe Sali Berishën. Megjithatë, ai theksoi se nuk bën dallim mes drejtuesit të PD-së dhe demokratëve, duke kundërshtuar barazimin e Berishës me simpatizantët apo deputetët e kësaj force politike.
“Rama dhe Berisha duhet të tërhiqen nga skena politike, nuk kanë çfarë t’i japin Shqipërisë sot. Por nuk vendos dot shenjë barazimi mes Berishës dhe demokratëve”, u shpreh Lapaj.
Ai propozoi gjithashtu që zgjedhjet lokale të 9 majit të shërbejnë si një mundësi për të nxjerrë kandidatë nga protestat, studentët dhe partitë e reja. Sipas tij, bashkimi i forcave opozitare nuk duhet të nënkuptojë domosdoshmërisht një marrëveshje mes kryetarëve të partive.
Agron Shehaj, kryetar i Partisë “Mundësia”, refuzoi gjithashtu një koalicion me demokratët, duke kujtuar se kishte marrë të njëjtin qëndrim edhe përpara zgjedhjeve parlamentare të vitit 2025. Ai argumentoi se bashkimi me Berishën nuk do të ndihmonte në largimin e Ramës nga pushteti.
“Nëse ne do ta pranonim ftesën e Sali Berishës, nuk e largojmë Edi Ramën. Bashkimi nuk është asgjë, nuk na ndihmon ta rrëzojmë Edi Ramën”, ishte qëndrimi i Shehajt në emision. Ai kujtoi edhe refuzimin e mëparshëm, duke thënë se nuk e kishin parë të arsyeshëm koalicionin me PD-në.
Edhe Arlind Qori, drejtues i “Lëvizjes Bashkë”, përjashtoi çdo mundësi bashkëpunimi me Berishën. Ai e vendosi kryetarin e PD-së në të njëjtën linjë politike me Edi Ramën, duke e cilësuar “sivëllain” e kryeministrit.
“Edi Rama është pushtetari më i keq, por Berisha është sivëllai i tij. Berisha ka edhe një dozë të parrëfyeshme pafytyrësie”, deklaroi Qori.
Ai akuzoi Ramën dhe Berishën se ndajnë interesa me oligarkë dhe ndërtues, ndërsa kritikoi kryedemokratin për ftesën për bashkëpunim, vetëm pak ditë pasi, sipas tij, e kishte sulmuar publikisht.
Ndërkohë, ftesa e Berishës për bashkim me partitë e tjera opozitare u bë gjatë një interviste televizive, ku ai deklaroi se ishte i gatshëm të takohej me këdo që kishte si objektiv largimin e Edi Ramës nga pushteti.
Gjatë së njëjtës intervistë, kryedemokrati u pyet edhe për mundësinë e largimit të tij nga drejtimi i Partisë Demokratike. Berisha tha se do të tërhiqej në momentin kur të ndiente se nuk kishte më mundësi fizike apo mendore për të përmbushur detyrat, por nuk dha një afat konkret.
“Momentin që unë të ndjej pamundësinë më të vogël fizike në detyrimet e mia fizike ose mendore, absolutisht, me lehtësi dhe pa vështirësi do të them ‘Goodbye’”, u shpreh ai.
I pyetur nëse Belind Këlliçi mund të ishte një emër për drejtimin e ardhshëm të PD-së, Berisha deklaroi se gara për kreun e partisë mbetet e hapur.
Kështu, ndërsa Berisha kërkon krijimin e një fronti të përbashkët opozitar kundër qeverisë Rama, përgjigjja e Lapajt, Shehajt dhe Qorit tregon se bashkëpunimi me PD-në nën drejtimin e tij nuk është pjesë e alternativave që ata kanë pranuar. Qëndrimet e tyre ndryshojnë në mënyrën se si e shohin opozitën dhe rrugën për largimin e qeverisë, por të tre kanë refuzuar ftesën e kryedemokratit.
