Ish-kreu i Prokurorisë së Vlorës, Aurel Zarka, i cili ishte dënuar për korrupsion dhe ndikim të paligjshëm në çështje penale, është liruar nga qelia.

Vendimi për lirimin e tij është marrë nga gjyqtari Florjan Kalaja, i cili pasi dëgjoi palët në proces, pranoi kërkesën për ndryshimin e masës së sigurisë.

Aurel Zarka ishte më herët i dënuar me 4 vite burg, që pas gjykimit të shkurtuar ishte ulur në 2 vite e 8 muaj heqje lirie, për korrupsion aktiv e pasiv në disa raste, si dhe për ushtrim ndikimi të paligjshëm në çështje penale.

Ai ishte ndaluar në maj të vitit të kaluar me masën “arrest me burg” dhe aktualisht rezulton se është liruar rreth një vit përpara përfundimit të dënimit të caktuar.

Në vendimin e mëparshëm të Gjykata e Posaçme Kundër Korrupsionit dhe Krimit të Organizuar, Aurel Zarka ishte shpallur fajtor edhe për përfshirje në çështjen e njohur si “Toyota Auris”, si dhe për ndërhyrje në dosje të tjera hetimore gjatë ushtrimit të detyrës.

Ndërkohë, prokuroria kishte kërkuar më herët dënim më të rëndë, deri në 4 vite e 6 muaj burgim, që në gjykim të shkurtuar do të përkthehej në 3 vite heqje lirie.