Pas 16 vitesh në opozitë, Partia Demokratike zgjodhi që Kuvendin e saj Kombëtar ta hapë jo me një platformë politike, jo me një vizion të ri ekonomik apo organizativ, por me një video të krijuar nga inteligjenca artificiale.
Avatarët, ironia ndaj kundërshtarëve dhe spektakli teknologjik mund të prodhojnë duartrokitje momentale, por vështirë se japin përgjigje për pyetjen që ndjek opozitën prej më shumë se një dekade e gjysmë: si synon të rikthehet në pushtet?
Videoja me avatarin e Skënderbeut dhe batutat për “Diellën” krijoi zhurmë mediatike, por ekspozoi një kontrast më të madh. Ndërsa drejtuesit e partisë investojnë energji tek simbolika dhe performanca, një pjesë e demokratëve vazhdojnë të mbeten në terrenin politik të përditshëm, mes lodhjes së gjatë opozitare, humbjeve të njëpasnjëshme elektorale dhe mungesës së një narrative të re mobilizuese.
Problemi i Partisë Demokratike sot nuk duket të jetë teknologjia. Problemi është boshllëku strategjik.
Pas 16 vitesh larg qeverisjes, një forcë politike zakonisht pritet të dalë para mbështetësve me përgjigje konkrete se çfarë do bëjë ndryshe, cilët njerëz do e përfaqësojnë, si do ndërtojë shumicën dhe si do bindë votuesit e zhgënjyer. Në vend të kësaj, hapja e Kuvendit u dominua nga një produkt komunikimi.
Paradoksi bëhet edhe më i dukshëm në raport me bazën. Demokratët që prej vitesh mbajnë peshën e aksionit politik në terren, protestave, fushatave dhe konflikteve të brendshme, panë një Kuvend që nisi më shumë si performancë dixhitale sesa si moment reflektimi politik.
Sigurisht, politika moderne përdor teknologjinë dhe inteligjenca artificiale është pjesë e komunikimit të ri. Por teknologjia nuk zëvendëson dot organizimin, idetë apo besueshmërinë.
Në fund, pyetja që mbetet pas këtij Kuvendi nuk është sa kushtoi avatari i PD-së apo sa i suksesshëm ishte efekti vizual. Pyetja reale është nëse pas 16 vitesh opozitë, Partia Demokratike ka ndërtuar një rrugë reale drejt pushtetit apo vazhdon të kërkojë vëmendje përmes spektaklit.
Kuvendi Kombëtar i PD/ Avatari i Skënderbeut ironizon Ramën dhe Diellën
