Kryetari i Partisë Demokratike, Sali Berisha, ka ashpërsuar sot tonet politike gjatë fjalës së mbajtur në protestën e opozitës përpara Kryeministrisë, duke krahasuar veprimet e Policisë së Shtetit me ato të regjimit të ish-presidentit sirian Bashar al-Assad.
Berisha deklaroi se ngjarjet e së premtes në Tiranë kanë shfaqur, sipas tij, “pamje të paprecedentë në Europë”, duke pretenduar se qytetarët dhe deputetët janë përballur me dhunë dhe përdorim të substancave irrituese gjatë protestës.
“Pamje që të kujtonin sulmet e Asadit mbi popullin e tij… por këto pamje nuk ishin as nga Siria, as nga Iraku, por nga Shqipëria në zemër të Europës,” u shpreh Berisha, duke akuzuar kryeministrin Edi Rama dhe drejtues të lartë të policisë për organizimin e dhunës.
Ai përmendi gjithashtu ministrin e Brendshëm dhe drejtues të Policisë së Shtetit, duke i akuzuar për përdorim force të tepruar ndaj protestuesve paqësorë. Sipas tij, qytetarët dhe deputetët janë përballur me “spraj toksik” dhe ndërhyrje të dhunshme nga forcat e rendit.
Berisha tha se në vendet europiane protestat mund të jenë të tensionuara, por sipas tij, nuk ndodh që qytetarët të trajtohen në këtë mënyrë. “Në Europë ka protesta, por nuk ka pamje si këto që u panë në Shqipëri,” deklaroi ai.
Në vijim të fjalës së tij, kreu i opozitës akuzoi qeverinë për përdorim të tepruar të forcës dhe për, siç u shpreh ai, “dhunë ndaj qytetarëve paqësorë”. Ai shtoi se Partia Demokratike nuk do të ndalet në protestat e saj deri në rrëzimin e qeverisë aktuale.
“Protesta jonë e ardhshme do jetë proporcionale me dhunën që na u bë,” tha Berisha, duke e cilësuar qeverinë si “bandite” dhe duke paralajmëruar përshkallëzim të aksioneve opozitare.
Deklaratat e Berishës vijnë në një klimë të tensionuar politike, ndërsa përplasjet mes opozitës dhe qeverisë vijojnë të thellohen pas protestave të fundit.
