Ish-ministri i Brendshëm dhe ish-deputeti Luan Rama ka reaguar ashpër ndaj deklaratave të kryeministrit Edi Rama në mbledhjen e Grupit Parlamentar të Partisë Socialiste, ku ky i fundit kishte thënë se ish-drejtoresha e AKSHI, Mirlinda Karçanaj, jetonte me qira dhe nuk zotëronte pasuri.

Në një status të gjatë në rrjetet sociale, Luan Rama e konsideron të pavend dhe të rrezikshme këtë deklaratë, duke theksuar se çështja ndodhet nën hetim nga SPAK dhe se çdo koment publik nga kryeministri mund të ndikojë në procesin ligjor.

Ai shprehet se një kryeministër nuk duhet të japë garanci personale për individë që janë objekt hetimi, duke shtuar se kjo krijon përplasje mes deklarimeve politike dhe veprimeve të drejtësisë.

Sipas tij, ndërkohë që SPAK ka ndërmarrë hetime dhe sekuestrime pasurish, deklaratat publike që bien ndesh me gjetjet e hetimit krijojnë konfuzion te publiku dhe cenojnë besimin institucional.

Në reagimin e tij, Luan Rama ngre gjithashtu pyetjen nëse një kryeministër duhet të marrë përsipër të flasë si garant për çështje që janë në kompetencë të drejtësisë, duke theksuar se një qasje e tillë mund të dëmtojë ndarjen mes pushtetit ekzekutiv dhe atij gjyqësor.

Deklaratat e tij vijnë pas polemikave të krijuara nga qëndrimi i kryeministrit për rastin e ish-drejtoreshës së AKSHI-t, e cila po hetohet nga SPAK për çështje që lidhen me pasuri dhe akuza për grup të strukturuar kriminal.