Ish-Presidenti i Republikës dhe aktualisht kreu i Partisë së Lirisë, Ilir Meta, ka bërë një deklaratë të gjatë publike nga qelia, ku ngre akuza të forta për shkelje të të drejtave të tij në IEVP “Jordan Misja” në Tiranë.
Deklarata e tij, e shpërndarë në formë audio dhe letre drejtuar Komitetit Shqiptar të Helsinkit, vjen pas një vizite që përfaqësuesi i këtij institucioni, Zylyftar Bregu, ka zhvilluar në ambientet e paraburgimit, ku ka verifikuar disa nga pretendimet e ngritura nga Meta dhe ka kontaktuar me drejtues të burgut.
Pretendimet për kushte dhe trajtim në qeli
Në deklaratën e tij, Meta thotë se në qelinë ku qëndron janë konstatuar mungesa të kushteve bazë, përfshirë mungesën e ndriçimit në tualet, e cila sipas tij është rregulluar vetëm pas ndërhyrjes së përfaqësuesve të Komitetit të Helsinkit.
Ai shprehet se këto probleme janë neglizhuar për një periudhë të gjatë dhe se janë shembull i “sjelljeve abuzive dhe ordinere” ndaj tij si i paraburgosur.
Gjithashtu, Meta pretendon se janë krijuar pengesa edhe për ushtrimin fizik në qeli, duke përmendur raste të dëmtimit të mjeteve që përdoren për stërvitje, si bidonë plastikë të modifikuar.
Akuza për kufizim të të drejtave
Një nga shqetësimet kryesore të ngritura prej tij lidhet me të drejtën për ajrosje dhe komunikim. Meta thotë se, ndryshe nga deklarimet e policisë së burgut, ai nuk trajtohet njësoj si të paraburgosurit e tjerë.
Ai pretendon se i është kufizuar ajrosja dhe se i janë bllokuar disa të drejta komunikimi, përfshirë edhe kontaktet telefonike me drejtues të Partisë së Lirisë.
Sipas tij, këto masa përbëjnë shkelje të të drejtave të garantuara nga Kushtetuta dhe Konventa Europiane për të Drejtat e Njeriut.
Kërkesa për transparencë dhe hetim
Në letrën e tij, Meta kërkon ballafaqim me drejtues të policisë së burgut dhe transparencë të plotë mbi vendimet disiplinore të marra ndaj tij, për të cilat thotë se nuk i është dhënë ende një dokument zyrtar i plotë me arsyet e dënimit administrativ.
Ai shprehet i gatshëm të përballet publikisht me çdo përfaqësues të institucioneve të burgjeve për të sqaruar pretendimet e tij.
Meta ngre gjithashtu shqetësime mbi mënyrën se si, sipas tij, po trajtohen deklaratat publike dhe komunikimi i tij me median, duke pretenduar se i është kufizuar e drejta për t’u mbrojtur publikisht nga akuzat.
Përfshirja e Komitetit Shqiptar të Helsinkit
Në fokus të deklaratës së tij është edhe roli i Komitetit Shqiptar të Helsinkit, drejtueses së tij Komiteti Shqiptar i Helsinkit Erida Skëndaj, të cilës Meta i është drejtuar me një letër të gjatë ku i kërkon verifikim të kushteve dhe trajtimit të tij në paraburgim.
Ai falënderon Komitetin për vizitën në qeli, por njëkohësisht ngre pretendime se disa nga informacionet e marra nga autoritetet e burgut nuk pasqyrojnë realitetin sipas tij.
Nga ana tjetër, autoritetet e burgjeve kanë deklaruar më herët se të gjithë të paraburgosurit trajtohen sipas rregullave të njëjta ligjore dhe se kushtet në institucionet e vuajtjes së dënimit monitorohen rregullisht.
