Presidenti amerikan Donald Trump ka kërkuar ndërhyrjen e Gjykatës Supreme të Shteteve të Bashkuara për të rrëzuar vendimin që e detyron të paguajë 83.3 milionë dollarë dëmshpërblim ndaj shkrimtares E. Jean Carroll për shpifje.
Në kërkesën e paraqitur para gjykatës më të lartë në SHBA, avokatët e Trump argumentojnë se deklaratat për të cilat ai u padit janë bërë në vitin 2019, gjatë kohës kur ai mbante postin e presidentit, dhe për këtë arsye duhet të mbrohen nga imuniteti presidencial.
Mbrojtja e Trump mbështetet edhe te një vendim i Gjykatës Supreme i vitit 2024, i cili përcaktoi se presidentët gëzojnë mbrojtje të gjerë ligjore për veprimet zyrtare të kryera gjatë ushtrimit të detyrës.
Sipas ekipit ligjor të Trump, çështja e Carroll krijon një precedent të pazakontë dhe të rrezikshëm, pasi një ish-president po mbahet përgjegjës financiarisht për deklarata që, sipas tyre, lidhen me funksionin presidencial.
Avokatët e tij kanë kërkuar gjithashtu që Gjykata Supreme të shqyrtojë nëse përgjegjësia për këto deklarata duhet t’i takojë vetë Trumpit apo qeverisë federale, duke argumentuar se çështja lidhet me një veprim të kryer gjatë mandatit presidencial.
Përplasja ligjore me E. Jean Carroll
Padia e E. Jean Carroll lidhet me deklaratat që Trump bëri në vitin 2019, pasi shkrimtarja e akuzoi atë për abuzim seksual. Trump i mohoi akuzat dhe e akuzoi Carroll se kishte sajuar historinë për të promovuar librin e saj.
Një juri në Nju Jork vendosi në favor të Carroll dhe urdhëroi Trump të paguajë 83.3 milionë dollarë për dëmet e shkaktuara nga deklaratat e tij. Vendimi u la në fuqi edhe nga një gjykatë apeli.
Tashmë çështja i është dërguar Gjykatës Supreme, e cila pritet ta shqyrtojë kërkesën gjatë vjeshtës. Nëse gjykata vendos ta marrë në shqyrtim çështjen, vendimi përfundimtar pritet të merret gjatë vitit të ardhshëm.
Ndërkohë, kjo nuk është beteja e vetme ligjore mes Trump dhe Carroll. Në një proces tjetër të veçantë, ish-presidenti është urdhëruar të paguajë 5 milionë dollarë dëmshpërblim ndaj saj për abuzim seksual dhe shpifje, vendim që gjithashtu është kundërshtuar nga pala e Trump.
