Qyteti i Tirana është përballur këtë të mërkurë me një situatë të rënduar në transportin publik, pasi flota e autobusëve është reduktuar ndjeshëm, duke shkaktuar vonesa të gjata dhe fluks qytetarësh në stacione.

Sipas operatorëve të transportit urban dhe ndërurban, në funksion kanë dalë vetëm rreth 115 autobusë nga afro 200 gjithsej, duke sjellë një përgjysmim të ndjeshëm të shërbimit në linjat e qytetit.

Qytetarët: Pritje të gjata dhe vështirësi në lëvizje

Situata është reflektuar menjëherë tek qytetarët, të cilët raportojnë pritje të gjata dhe mbingarkesë në autobusë. Shumë prej tyre shprehen se janë detyruar të presin mbi 30 minuta për një linjë, ndërsa në disa raste udhëtimet kanë zgjatur shumë më tepër se zakonisht.

“10-15 minuta, sot shkoi gjysmë ore… nuk eci dot në këmbë,” thotë një qytetar, duke përshkruar vështirësitë në lëvizje.

Një tjetër qytetar tregon se ka kaluar orë të tëra në autobusë gjatë udhëtimeve ndërqytetëse dhe brenda Tiranës, duke e cilësuar situatën si të papërballueshme për pasagjerët e përditshëm.

Operatorët: Rritje kostosh dhe mungesë mbështetjeje

Sipas Shoqatës së Transportit Urban dhe Interurban, reduktimi i flotës vjen si pasojë e rritjes së kostove operative, veçanërisht të çmimit të karburantit, si dhe mungesës së masave mbështetëse nga institucionet.

Kreu i Shoqatës së Transportit Urban, Dashnor Memaj, deklaron se situata mund të përkeqësohet më tej nëse nuk merren masa.

“Sot kemi 40%, nesër mund të shkojë edhe më shumë. Nuk kemi informacion nëse kërkesat tona po merren për bazë,” u shpreh ai.

Paralajmërim për përshkallëzim të situatës

Shoqatat e transportit kanë paralajmëruar se reduktimi i linjave mund të thellohet në ditët në vijim nëse nuk ka ndërhyrje institucionale për të adresuar kërkesat e tyre, përfshirë subvencionimin e kostove dhe rishikimin e politikave të transportit publik.

Ndërkohë, institucionet nuk kanë dhënë ende një reagim zyrtar lidhur me situatën, duke lënë qytetarët përballë një shërbimi të kufizuar dhe me pasiguri për ditët në vijim.